ભરૂચ :
ચોમાસા દરમિયાન સંભવિત પૂર જેવી આપત્તિની સ્થિતિમાં ઝડપી, અસરકારક અને સુમેળભરી બચાવ કામગીરી થઈ શકે તે માટે ભરૂચ જિલ્લા આપત્તિ વ્યવસ્થાપન તંત્ર દ્વારા હાંસોટ તાલુકાના ઓભા ગામે પૂર બચાવની મોકડ્રીલનું આયોજન કરવામાં આવ્યું હતું. મોકડ્રીલમાં વિવિધ વિભાગોએ સંકલન સાથે કામગીરી કરી આપત્તિ સમયે કેવી રીતે તાત્કાલિક પ્રતિસાદ આપવો તેનું જીવંત પ્રદર્શન કરવામાં આવ્યું હતું.
મોકડ્રીલ દરમિયાન અતિભારે વરસાદને કારણે નદીમાં અચાનક પૂર આવ્યું હોવાની કાલ્પનિક પરિસ્થિતિ ઊભી કરવામાં આવી હતી. આ દૃશ્યમાં નદી કિનારે કામ કરી રહેલા કેટલાક લોકો પાણીના જોરદાર પ્રવાહમાં ફસાઈ ગયા હોવાનું દર્શાવવામાં આવ્યું હતું. ઘટનાની જાણ થતાં જ બચાવ દળો અને સ્થાનિક તરવૈયાઓ તાત્કાલિક ઘટનાસ્થળે પહોંચી બચાવ કામગીરી હાથ ધરી હતી.
સ્થાનિક તરવૈયાઓએ કુશળતા અને ઝડપી કાર્યવાહી દ્વારા પાણીમાં ફસાયેલા બે લોકોને સુરક્ષિત રીતે બહાર કાઢી પ્રાથમિક બચાવ કામગીરી સફળતાપૂર્વક પૂર્ણ કરી હતી. મોકડ્રીલ દરમિયાન બચાવ કામગીરીમાં સમયસર પ્રતિસાદ, સંકલન અને જરૂરી સાધનોના ઉપયોગ અંગે પણ પ્રાયોગિક માર્ગદર્શન આપવામાં આવ્યું હતું.
સમગ્ર મોકડ્રીલ દરમિયાન હાંસોટના મામલતદાર મકવાણા સ્થળ પર હાજર રહી કામગીરીનું નિરીક્ષણ અને માર્ગદર્શન આપ્યું હતું. મોકડ્રીલ પૂર્ણ થયા બાદ સમગ્ર કામગીરીની સમીક્ષા કરવામાં આવી હતી અને ભવિષ્યમાં પૂર જેવી આપત્તિ સમયે વધુ અસરકારક રીતે કામગીરી થઈ શકે તે માટે સંબંધિત વિભાગોને જરૂરી સૂચનો આપવામાં આવ્યા હતા.
જિલ્લા આપત્તિ વ્યવસ્થાપન તંત્ર દ્વારા યોજાયેલી આ મોકડ્રીલનો મુખ્ય હેતુ વિવિધ વિભાગો વચ્ચે સંકલન મજબૂત બનાવવાનો, બચાવ દળોની તૈયારી ચકાસવાનો અને આપત્તિના સમયે જાનહાનિ ઘટાડવા માટે ત્વરિત પ્રતિસાદ સુનિશ્ચિત કરવાનો હતો.
