ભરૂચ:
ભરૂચ જિલ્લા સાયબર ક્રાઇમ પોલીસ સ્ટેશનના બે કર્મચારીઓને સાયબર ગુનાઓની તપાસ, નિવારણ, જનજાગૃતિ અને બેંકો સાથેના અસરકારક સંકલનમાં નોંધપાત્ર કામગીરી બદલ રાજ્યકક્ષાનો પ્રતિષ્ઠિત એવોર્ડ એનાયત કરવામાં આવ્યો છે.
સમગ્ર ગુજરાત રાજ્યમાંથી સાયબર ક્રાઇમ ડિટેક્શન, પ્રિવેન્શન, અવેરનેસ અને બેંકો સાથેના સંકલનમાં શ્રેષ્ઠ કામગીરી કરનારા કુલ સાત પોલીસ અધિકારીઓ અને કર્મચારીઓની પસંદગી કરવામાં આવી હતી. તેમાં ભરૂચ સાયબર ક્રાઇમ પોલીસ સ્ટેશનના મલ્કેશ ગોહિલ અને સોહેલ રાજનો સમાવેશ થયો હતો.
ગાંધીનગર ખાતે 22 જુલાઈ, 2026ના રોજ યોજાયેલા સમારોહમાં ગુજરાત રાજ્યના નાયબ મુખ્યમંત્રી હર્ષ સંઘવી અને ડીઆઈજી જ્ઞાનેન્દ્રસિંહ મલિકના હસ્તે બંનેને એવોર્ડ અર્પણ કરવામાં આવ્યા હતા.
ભરૂચ જિલ્લા માટે ગૌરવની વાત એ છે કે મલ્કેશ ગોહિલને સાયબર ક્રાઇમ ક્ષેત્રે સતત સાતમી વખત રાજ્યકક્ષાનો એવોર્ડ પ્રાપ્ત થયો છે, જ્યારે સોહેલ રાજને ચોથી વખત આ સન્માન મળ્યું છે.
બંને કર્મચારીઓએ સાયબર છેતરપિંડીના અનેક ગુનાઓ ઉકેલવામાં, ભોગ બનનાર લોકોને તેમના નાણાં પરત અપાવવામાં તેમજ લોકોમાં સાયબર સુરક્ષા અંગે જાગૃતિ લાવવામાં મહત્વપૂર્ણ યોગદાન આપ્યું છે. ઉપરાંત, સાયબર ફ્રોડના કેસોમાં પોલીસ અને બેંકિંગ સિસ્ટમ વચ્ચે ઝડપી સંકલન સ્થાપિત કરવામાં પણ તેમની કામગીરી નોંધપાત્ર રહી છે.
આ સતત શ્રેષ્ઠ કામગીરી બદલ મળેલા રાજ્યકક્ષાના સન્માનથી ભરૂચ જિલ્લા પોલીસનું ગૌરવ વધ્યું છે. સાયબર ગુનાઓ સામે અસરકારક કામગીરી, ટીમવર્ક અને જનસુરક્ષા પ્રત્યેની પ્રતિબદ્ધતાની રાજ્યકક્ષાએ નોંધ લેવાતા જિલ્લા પોલીસ માટે આ સિદ્ધિ ગૌરવપૂર્ણ માનવામાં આવી રહી છે.
