ભરૂચ: ભરૂચમાં લાંચરુશ્વત વિરોધી બ્યુરો (ACB)એ મોટી કાર્યવાહી કરી છે. ફૂડ એન્ડ ડ્રગ્સ વિભાગની ભરૂચ કચેરીમાં દવાના નવા હોલસેલ પરવાના આપવા બદલ ₹40,000ની લાંચ લેતા વર્ગ-1ના મદદનીશ કમિશ્નર અને વર્ગ-2ના ડ્રગ્સ ઇન્સ્પેક્ટરને રંગેહાથ ઝડપી પાડવામાં આવ્યા છે.
ACBની માહિતી મુજબ, ફરિયાદીએ દવાના નવા હોલસેલ પરવાના માટે અરજી કરી હતી. પરવાના અંગેની પ્રક્રિયા માટે ડ્રગ્સ ઇન્સ્પેક્ટર સુરભીબેન મોહનલાલ દેસાઈએ ₹40,000થી ₹50,000 લાંચની માંગણી કરી હોવાનો આક્ષેપ છે.
ફરિયાદી લાંચ આપવા ઇચ્છતા ન હોવાથી તેમણે ACBનો સંપર્ક કર્યો હતો. ત્યારબાદ ACB દ્વારા લાંચનું છટકું ગોઠવવામાં આવ્યું હતું. છટકા દરમિયાન મદદનીશ કમિશ્નર પ્રકાશભાઈ નાનકરામ પોસનાની અને ડ્રગ્સ ઇન્સ્પેક્ટર સુરભીબેન મોહનલાલ દેસાઈ ₹40,000 સ્વીકારતા ઝડપાયા હતા.
ACBએ બંને અધિકારીઓ સામે ભ્રષ્ટાચાર નિવારણ અધિનિયમ હેઠળ ગુનો નોંધીને ₹40,000ની લાંચની રકમ રિકવર કરી વધુ કાયદેસરની કાર્યવાહી હાથ ધરી છે.
આ ઘટનાથી ભરૂચના ફૂડ એન્ડ ડ્રગ્સ વિભાગમાં લાંચના મામલે ચકચાર મચી છે.
