ભરૂચ :
હાંસોટમાં તાજેતરમાં થયેલી હિંસક અથડામણ બાદ પોલીસ અને વહીવટી તંત્ર દ્વારા અસામાજિક તત્વો સામે કડક કાર્યવાહી શરૂ કરવામાં આવી છે. હાંસોટ સર્કલ નજીક સરકારી જમીન પર કરવામાં આવેલા કથિત ગેરકાયદેસર દબાણો પર તંત્રએ બુલડોઝર ફેરવી કેબિનો દૂર કરી હતી.
અથડામણના આરોપી અબ્દુલ કાદિર કાનૂગા અને ઇદ્રિશ ખ્વાજા સાથે સંકળાયેલા હોવાનું જણાવાતા કથિત દબાણો સામે આ કાર્યવાહી કરવામાં આવી હતી. પોલીસ અને વહીવટી તંત્રની હાજરીમાં બુલડોઝર મારફતે સરકારી જમીન પરથી દબાણો હટાવવામાં આવ્યા હતા.
કાર્યवाही દરમિયાન કોઈ અનિચ્છનીય બનાવ ન બને તે માટે સ્થળ પર ચુસ્ત પોલીસ બંદોબસ્ત ગોઠવાયો હતો. હાંસોટ પોલીસ ઈન્સ્પેક્ટર નયન વસાવા, મામલતદાર રણજીત મકવાણા, તાલુકા વિકાસ અધિકારી સહિતના અધિકારીઓ સ્થળ પર હાજર રહ્યા હતા.
અધિકારીઓની દેખરેખ હેઠળ સમગ્ર દબાણ હટાવવાની કાર્યવાહી પૂર્ણ કરવામાં આવી હતી. અથડામણ બાદ તંત્રની આ કાર્યવાહીથી અસામાજિક તત્વોમાં ફફડાટ ફેલાયો હોવાનું જોવા મળ્યું હતું. સરકારી જમીન પરના ગેરકાયદેસર દબાણો સામેની કાર્યવાહીથી હાંસોટમાં કાયદો-વ્યવસ્થા જાળવવા તંત્ર વધુ સક્રિય બન્યું છે.
