ભરૂચ :
ભરૂચના પાલેજ નજીક આવેલા ટંકારીયા ગામે કેનાલમાં ડૂબી જવાથી 22 વર્ષીય યુવકનું કરુણ મોત નીપજ્યું હતું. મંડપનું કપડું ધોવા માટે કેનાલ પર ગયેલા યુવકનો અચાનક પગ લપસી જતાં તે ઊંડા પાણીમાં ગરકાવ થઈ ગયો હતો. ઘટનાને પગલે ગામમાં શોકનો માહોલ છવાઈ ગયો હતો.
પ્રાપ્ત માહિતી અનુસાર, ટંકારીયા ગામમાં રહેતા દશરથ શંકરભાઈ વસાવા મંડપનું કપડું ધોવા માટે ગામ નજીક આવેલી કેનાલ પર ગયા હતા. આ દરમિયાન અચાનક તેમનો પગ લપસી જતાં તેઓ કેનાલના ઊંડા પાણીમાં પડી ગયા હતા અને ડૂબી જવાથી તેમનું મોત નીપજ્યું હતું. બનાવની જાણ થતાં સ્થાનિક લોકોમાં દોડધામ મચી ગઈ હતી.
ઘટનાની જાણ પાલેજ પોલીસને કરવામાં આવતાં પોલીસ સ્ટાફ તાત્કાલિક ઘટનાસ્થળે પહોંચ્યો હતો. ત્યારબાદ યુવકના મૃતદેહને કેનાલમાંથી બહાર કાઢી પોસ્ટમોર્ટમ અર્થે મોકલી આપવામાં આવ્યો હતો. આ મામલે પાલેજ પોલીસે જરૂરી કાર્યવાહી હાથ ધરી વધુ તપાસ શરૂ કરી છે.
22 વર્ષીય યુવકના અચાનક મોતથી પરિવારજનોમાં શોકની લાગણી ફેલાઈ ગઈ હતી, જ્યારે સમગ્ર ટંકારીયા ગામમાં પણ ગમગીની છવાઈ ગઈ હતી.
