મુખ્યમંત્રી ભૂપેન્દ્ર પટેલે ગુજરાતની પાંચ નગરપાલિકાઓ નવસારી, બારડોલી, રાજપીપળા લુણાવાડા અને ધોળકામાં નવા મોડલ ફાયર સ્ટેશનના નિર્માણ માટે સૈદ્ધાંતિક મંજૂરી આપી છે. આ નગરપાલિકાઓમાં હવે જિલ્લાકક્ષાના મોડલ ફાયર સ્ટેશન સમગ્રતયા રૂ.36.12 કરોડના અંદાજિત ખર્ચે નિર્માણ થશે.
રાજ્યના શહેરી વિકાસ વિભાગે મુખ્યમંત્રી ભૂપેન્દ્ર પટેલ સમક્ષ આ પાંચ નગરપાલિકાઓની સામાન્ય સભામાં થયેલા ઠરાવના અનુસંધાને મોડલ ફાયર સ્ટેશન બનાવવાની દરખાસ્તો રજૂ કરી હતી. આ દરખાસ્તોમાં જણાવવામાં આવ્યું હતું કે, નવસારીમાં 5 હજાર ચોરસ મીટર જમીન પર 7.45 કરોડ, નર્મદા જિલ્લાની રાજપીપળા નગરપાલિકામાં 5500 ચો.મી. વિસ્તારમાં 7.38 કરોડ રૂપિયાના ખર્ચે, લુણાવાડા નગરપાલિકા વિસ્તારમાં 5 હજાર ચો.મી.માં 7.15 કરોડના ખર્ચે, તેમજ બારડોલી નગરમાં 6 હજાર ચો.મી. વિસ્તારમાં 7.72 કરોડ રૂપિયાના ખર્ચે અને ધોળકામાં 6 હજાર ચો.મી.માં 6.52 કરોડના ખર્ચે આ નવા મોડેલ ફાયર સ્ટેશન નિર્માણ કરવાના થાય છે.
ફાયર પ્રોટેક્શન સિસ્ટમ, અંડરગ્રાઉન્ડ વોટર ટેંક સહિત અદ્યતન સુવિધા
મુખ્યમંત્રી ભૂપેન્દ્ર પટેલે રાજ્યના આ નગરોમાં વધતા જતા ઔદ્યોગિક, સામાજિક અને આર્થિક વિકાસને ધ્યાનમાં લઈને આ બધી જ દરખાસ્તોને સૈદ્ધાંતિક અનુમોદન આપ્યું છે. આ નગરપાલિકાઓમાં મોડલ ફાયર સ્ટેશન અંતર્ગત ફાયર પ્રોટેક્શન સિસ્ટમ, અંડરગ્રાઉન્ડ વોટર ટેંક, એલિવેટેડ સ્ટોરેજ રિઝવર્યસ, ફાયર સ્ટેશનના કર્મચારીઓ માટે આવાસ તથા અદ્યતન સુવિધા સભર ફાયર સ્ટેશન બિલ્ડિંગના કામો હાથ ધરાશે.
