કુદરતી વાતાવરણ અને સુંદરતાનું નજરાણું ચોમાસા અને તેની બાદની ઋતુઓમાં જોવા મળતું હોય તો તે અંતરિયાળ વિસ્તારોમાં જોવા મળે છે, ચોમાસાની ઋતુ બાદથી આ વિસ્તારો સોળે કળાએ ખીલી ઉઠે છે, ડુંગર પર સુંદર ઝુંપડા અને વરસાદી માહોલ બાદથી વૃક્ષોની લીલીછમ ચાદર અને ડુંગરોના કોતરોમાંથી વહેતા નીર અહીંયા આવતા પ્રવાસી માટે આકર્ષણ ઉભું કર્યું છે.
ભરૂચ અને નર્મદા જિલ્લાના અનેક એવા અંતરિયાળ વિસ્તાર છે જે દિવાળીની રજાઓમાં હાલમાં હરવા ફરવા માટે અને શાંત વાતાવરણમાં માનસિક તણાવને દૂર કરવા માટે પ્રવાસીઓ માટેની પહેલી પસંદ બન્યા છે, એ જ પ્રકારનું એક સ્થાન છે નેત્રંગ તાલુકામાં આવેલું થવા ગામ નજીકનું ધાણીખૂંટ ગામ જ્યાં ધારીયા ધોધમાં આવેલા કોતર વચ્ચેના નિરે ભારે આકર્ષણ ઉભું કર્યું છે.
દિવાળી તહેવારની રજામાં મોટી સંખ્યામાં દૂરદૂરથી પ્રવાસીઓ ધારિયા ધોધ ખાતે ઉમટી પડ્યા હતા અને પોતાનો સમય આ કુદરતી વહેતા ધોધ વચ્ચે પસાર કરી રજાઓનો આનંદ લૂંટયો હતો, પ્રવાસીઓના ઉમટેલા ટોળાંના કારણે સ્થાનિકોમાં પણ એક અનેરો માહોલ છવાયો હતો સાથે જ પ્રવાસીઓના કારણે સ્થાનિકોને પણ રોજી રોટી માટેના અવસર ઉભા થયા હતા.
હારૂન પટેલ-ભરૂચ
