સુરતનાં વરાછા વિસ્તારમાં આવેલ એક જાણીતા જવેલર્સના શો રૂમને રાત્રી દરમ્યાન તસ્કરોએ નિશાન બનાવી અંદાજે સવા બે લાખ રૂપિયાના ચાંદીના દાગીનાની ચોરીને અંજામ આપ્યો હતો.

સુરતનાં મોટા વરાછા વિસ્તારમાં આવેલ જાણીતા જવેલર્સ ફેડર્સ ગોલ્ડ શોપનાં તાળા ગત મધ્યરાત્રી દરમ્યાન તસ્કરોએ તોડી મોટો હાથફેરો કર્યો હતો. મળતી વિગતો મુજબ તસ્કરોએ આ જવેલર્સને ત્યાંથી અંદાજે 5 કિલો ચાંદીના દાગીનાની ચોરી કરી હતી જેની બજાર કિંમત અંદાજે સવા બે લાખ ઉપરાંતની થાય છે. જોકે આ સમગ્ર ચોરીની ધટના જવેલરી શોપમાં મુકેલ સીસીટીવી કેમેરામાં કેદ થઈ ગઈ હતી. સીસીટીવી ફૂટેજ મુજબ વહેલી પરોઢે પાંચેક વાગ્યાના સુમારે તસ્કરોએ ચોરીને અંજામ આપ્યો હતો. તસ્કર ટોળકીએ જવેલરી શોપનાં તાળા તોડયા બાદ નજીકમાં રહેલ એક બેકરી, હાર્ડવેર તેમજ સાયકલની દુકાનોના પણ તાળા તોડયા હતા.
આ સમગ્ર ધટના ક્રમ અંગે વરાછા પોલીસને જાણ થતાં પોલીસ હરકતમાં આવી હતી. જોકે એક જ રાતમાં ચારચાર દુકાનોનાં તાળા તૂટયાની વારદાતને પગલે પોલીસનાં રાત્રી પેટ્રોલીંગની કામગીરી સામે પ્રશ્નો ઊભાં થયા છે.