સુરત ગુરૂવારે નાગરિકતા કાયદાના વિરોધમાં અમદાવાદમાં હિંસા ફાટી નીકળી હતી. આ હિંસામાંથી બોધપાઠ લઈને સુરત શહેર પોલીસે સંવેદનશીલ વિસ્તારોમાં ચૂસ્ત પોલીસ બંદોબસ્ત ગોઠવી દીધો છે અને ફ્લેગ માર્ચ પણ કરી હતી. શહેર પોલીસે અઠવાલાઈન્સ,સલાબતપુરા, ઉધના સહિતના વિસ્તારોમાં પોલીસની ફ્લેગ માર્ચ નીકળી હતી. તેમજ પોલીસને હિંસાત્મક ઘટનાનો કેવી રીતે સામનો કરવો અને પરિસ્થિતિ વણસે ત્યારે તેના પર કેવી રીતે કાબૂ મેળવવો તે અંગે માહિતી આપવામાં આવી હતી. પોલીસની સહાયતા માટે પેરામિલેટ્રી ફોર્સની પણ મદદ લેવામાં આવી રહી છે. સરકાર દ્વારા સુરત માટે એક કંપની ફાળવવામાં આવી છે.આ અંગે એસપી મોરેએ જણાવ્યું હતું કે, ગઈકાલે અમદાવાદમાં જે ઘટના બની તેવી સુરતમાં ઘટના ન બને તે માટે ખાસ ફ્લેગ માર્ચનું આયોજન કરવામાં આવ્યું છે. શહેરમાં સંપૂર્ણપણે શાંતિનો માહોલજોવા મળી રહ્યો છે. એકપણ સ્થળે કોઈપણ પ્રકારનો કાંકરીચાળો થયો નથી, તેમ છતાં પોલીસે પૂર્વ તૈયારીના ભાગરૂપે આ આયોજન કર્યું છે. તેની સાથે સાથે પોલીસ દ્વારા વિશેષ પેટ્રોલિંગ પણ કરવામાં આવી રહ્યું છે. તેમજ અનિચ્છનિય ઘટના ન બને તે માટે રાઉન્ડ ધ ક્લોક પેટ્રોલિંગ કરવામાં આવી રહ્યું છે.
