👉 મ્યુકર માઈકોસિસના રોગથી પાટડીના 58 વર્ષના આધેડનું અમદાવાદ સીવીલ હોસ્પીટલ ખાતે સારવાર દરમિયાન મોત નિપજતા ચકચાર મચી.
👉 સુરેન્દ્રનગર જીલ્લામાં કોરોનાના કહેર વચ્ચે મ્યુકર માઈકોસીસથી પ્રથમ મોતથી લોકોમાં ફફડાટ સાથે ભયની લાગણી ફેલાઈ જવા પામી.
ગુજરાત રાજય સહિત સુરેન્દ્રનગર જીલ્લામાં કોરોના વાઈરસની બીજી લહેર ઘાતક તરીકે શહેરી વિસ્તારોની સાથે સાથે ગ્રામ્ય પથંકમાં પણ પગ પેસારો કરી હાહાકાર મચાવ્યો છે અને ગ્રામ્ય પથંકમાં કોવિડ કેર સેન્ટરો પણ કોરોના પોઝીટીવ દર્દીઓથી ઉભરાયેલા નજરે પડી રહ્યાં છે. ત્યારે પાટડી ખાતે રહેતા અને ડ્રાઈવીંગની નોકરી કરતા 58 વર્ષના આધેડ અરજણભાઈ દાનાભાઇ ઠાકોરને 10 દિવસ અગાઉ કોરોના પોઝીટીવ રીપોર્ટ આવતા સારવાર અર્થે પાટડી કોવિડ કેર સેન્ટરમાં દાખલ કરવામાં આવ્યા હતા. જ્યાં એમનું ઓક્સિજન લેવલ ઓછું થતાં હાલત નાજૂક બનતા એમને વધુ સારવાર અર્થે અમદાવાદ સોલા સિવીલ હોસ્પિટલમાં લઈ જવામાં આવ્યા હતા. જ્યાં એમને સારવાર દરમિયાન ફંગલ ઇન્ફેકશન એટલે કે મ્યુકર માઇકોસિસ થતાં એમને ત્યાંથી અમદાવાદની અસારવા સિવીલ હોસ્પિટલ ખાતે ખસેડવામાં આવ્યા હતા. જ્યાં ઠાકોર સમાજના આધેડ ઉંમરના વ્યક્તિનું સારવાર દરમિયાન એમનું અકાળે અવસાન થતાં પરિવાર પર આભ તૂટી પડ્યું હતુ. સુરેન્દ્રનગર જીલ્લામાં કોરોનાની કહેર વચ્ચે મ્યુકર માઇકોસિસથી પહેલી મોતની ઘટનાથી લોકોમાં ફફડાટની સાથે ભયની લાગણી ફેલાઈ જવા પામી છે.
કલ્પેશ વાઢેર સુરેન્દ્રનગર
