લીંબડી હાઇવે પર અવારનવાર અકસ્માતની ઘટનાઓ બની રહી છે ત્યારે મોડી રાત્રે દેવપરા અને જનશાળી વચ્ચે બે ટ્રક અથડાતાં બન્ને ટ્રકમાં આગ ભભુકી ઉઠી હતી ત્યારે હાલ મળતી માહિતી મુજબ આ આગની લપેટમાં બે વ્યક્તિઓ પણ બળીને ખાખ બન્યાં હોવાનું જાણવા મળ્યું હતું.
અમદાવાદ-રાજકોટ હાઇવે પર જનશાળી ગામના પાટિયા પાસે બે ટ્રક વચ્ચે સર્જાયેલા અકસ્માત બાદ બન્ને વાહનોમાં આગ લાગવાની ઘટના બની હતી. આ અકસ્માતની ઘટનામાં ટ્રકમાં લાગેલી આગને કારણે બંને ટ્રકના ચાલકોનું ટ્રકમાં જ સળગી જવાથી કમકમાટીભર્યું મોત નિપજ્યું હતુ. બનાવની જાણ ફાયર વિભાગને થતા સ્ટાફ ઘટના સ્થળે દોડી જઇ પાણીનો મારો ચલાવી આગ પર કાબુ મેળવવાનો પ્રયાસ કર્યો હતો ભારે જહેમત બાદ ટીમે આગ પર કાબુ મેળવ્યો હતો.
બનાવ અંગેની જાણ પોલીસ સ્ટાફને થતા પોલીસ સ્ટાફ ઘટના સ્થળે દોડી જઇ પ્રાથમિક તપાસ કરતા જાણવા મળ્યું હતું કે કોઇ એક ટ્રકમાં જ્વલનશીલ પદાર્થ હોવાથી બંને ટ્રક ભડભડ સળગી ઉઠ્યા હતા. જ્યારે આ અકસ્માતની ઘટનામાં હજી મોતનો આંક વધવાની શક્યતાઓ સેવાઇ રહી છે. આ ઘટનાના પગલે લોકોના ટોળેટોળા ઘટનાસ્થળે દોડી ગયા હતા. જ્યારે આ ઘટના મામલે લીંબડી પોલીસે અકસ્માતે મોત અંગેનો ગુનો દાખલ કરી વધુ તપાસ હાથ ધરી છે.
કલ્પેશ વાઢેર સુરેન્દ્રનગર
