વડોદરા સેન્ટ્રલ જેલમાં ચકચારી ઘટના, ત્રણ કેદીઓએ એસિડ ગટગટાવ્યું.

વડોદરાની સેન્ટ્રલ જેલમાં આજે ખળભળાટ મચાવનારી એક ચકચારી ઘટના સામે આવી હતી, જેમાં જેલના બેરેકમાં એક સાથે ત્રણ જેટલા કેદીઓએ એસિડ ગટગટાવી લેતા ભારે દોડધામ મચી હતી. ઘટનામાં ઠગ હર્ષિલ લીંબચીયા સહિત ત્રણ કેદીઓએ એસિડ પીને આપઘાતનો પ્રયાસ કર્યો હોવાનું સામે આવ્યું છે.

જેલમાં જેલર દ્વારા કેદીઓને ત્રાસ આપી જેલર દ્વારા ટિફિન બંધ કરાવ્યું હોવાનું રટણ હર્ષિલ લીંબચીયા દ્વારા કરવામાં આવ્યું હતું, અત્રે ઉલ્લેખનીય છે કે જેલમાં બંધ કેદીઓ પાસે એસિડ કેવી રીતે આવ્યું તેવા સવાલ હાલ ચર્ચાનું કેન્દ્ર બન્યા છે. હાલમાં જેલ સ્ટાફ કેદીઓને લઈ એસ.એસ.જી હોસ્પિટલમાં પહોંચ્યો છે, જ્યાં તમામ કેદીઓની હાલત સ્થિર છે, તેમજ તમામને સારવાર અપાઇ રહી છે.