વડોદરામાં ડ્રગ્સનો કારોબાર કરવામાં ફરાર થયેલો પેડલર ભરૂચથી ઝડપાયો

વડોદરાના તુલસીવાડી વિસ્તારમાં ડ્રગ્સ સાથે પકડાયેલા એક કેરિયરના ફરાર થઈ ગયેલા સાગરીતને પોલીસે ભરૂચથી ઝડપી પાડ્યો છે.

તુલસીવાડીના રોશનનગર ખાતે એક મકાનમાં ડ્રગ્સનું વેચાણ કરવામાં આવી રહ્યું હોવાની વિગતોને પગલે ગઈ તા 26 જુને એસઓજીની ટીમે દરોડો પાડ્યો હતો. પોલીસે સાજીદ અલી પઠાણને ઝડપી પાડી રૂ 5.50 લાખની કિંમતનું 54 ગ્રામથી વધુ મેફેડ્રોન ડ્રગ્સ કબજે કર્યું હતું. પોલીસે રોકડા રૂ 29,500 અને મોબાઈલ પણ કબજે કર્યા હતા. પકડાયેલા ડ્રગ્સ પેડલરની સાથે તેનો મિત્ર ઝહીર ઉર્ફે ભુરીયો સિકંદર શેખ (રોશનનગર,તુલસીવાડી) પણ સંડોવાયો હોવાની વિગતો જાણવા મળતા પોલીસે તેની શોધખોળ કરી હતી. ઝહીર શેખ ભરૂચમાં હોવાની વિગતો મળતા પોલીસે દરોડો પાડી તેને ઝડપી પાડ્યો છે. આ ગુનામાં હજી મુંબઈનો ડ્રગ સપ્લાયર વોન્ટેડ છે.