વડોદરાના અલકાપુરીમાં ગટરમાં થતાં ગેસના કારણે ગટરના ઢાંકણામાંથી આગની જ્વાળાઓ ભભૂકી.

વડોદરાના અલકાપુરી વિસ્તારમાં આજે સવારે ગટરમાં થયેલા ગેસના કારણે આગ લાગતા ફાયર બ્રિગેડ ઘટનાસ્થળે પહોંચી આગ ઓલવવાની કામગીરી હાથ ધરી હતી.

વડોદરાના અલકાપુરી વિસ્તારમાં આજે સવારે અચાનક જ ગટરમાં થતાં ગેસના કારણે ગટરના ઢાંકણામાંથી આગની જ્વાળાઓ ભભૂકી હતી. જેથી ફાયરબ્રિગેડનો કાફલો ઘટનાસ્થળે દોડી આવ્યો હતો અને આગને કાબૂમાં લેવાની કામગીરી શરૂ કરી હતી. જોકે આગ ગેસને કારણે લાગી હોવાથી તે હવામાં પણ પ્રસરેલી હતી. જેથી આગ ઓલવી રહેલ ફાયરબ્રિગેડના બંબાને પણ આગે લપેટામાં લઇ લીધો હતો. ફાયરબ્રિગેડની ગાડી એક ઢાંકણાથી નિકળતી આગની જ્વાળાઓ પર પાણી નાખી રહી હતી. ત્યારે ગટરના બીજા ઢાંકણામાંથી પણ આગ ભભૂકી હતી. જેણે ફાયરબ્રિગેડની ગાડીને લપેટામાં લઇ લીધી હતી.