ભરૂચ જિલ્લાના ઝઘડિયા તાલુકામાં છ ચરણમાં યોજાનાર સેવાસેતુ કાર્યક્રમનો આજરોજ ઝઘડિયા કોમ્યુનિટી હોલ ખાતેથી પ્રારંભ કરવામાં આવ્યો હતો. ઝઘડીયા મામલતદાર અને આયોજન સહ તાલુકા વિકાસ અધિકારીના માર્ગદર્શન હેઠળ યોજાયેલ આ સેવાસેતુના કાર્યક્રમમાં કાર્યક્રમ અંતર્ગત સમાવી લેવાયેલ ગામોની જનતાના વિવિધ કામોનો સ્થળ પર નિકાલ કરવાની કામગીરી હાથ ધરવામાં આવી હતી.
રેશનકાર્ડ આધારકાર્ડ આવક જાતિના દાખલા, સિનિયર સિટીઝન પ્રમાણપત્ર, સમાજ કલ્યાણને લગતી કામગીરી, વિધવા સહાય, જમીન માપણી, સહકાર અને કૃષિ, પશુપાલન વિભાગ, ફોરેસ્ટ વિભાગ, ડીજીવીસીએલ, એસટી ડેપોને સંબંધી કામગીરી ઉપરાંત વિવિધ દાખલાઓ આપવા ઉપરાંત અન્ય કેટલાક જરુરી કામોને લગતી કામગીરી સ્થળ ઉપર કરી આપવામાં આવી હતી. ઘર આંગણે લોકોના વિવિધ કામોનો નિકાલ કરવાના હેતુથી સેવાસેતુ કાર્યક્રમ યોજવામાં આવતા હોય છે.
આજરોજ ઝઘડિયા ખાતે ઝઘડિયાના સરપંચ સુરેશભાઈ વસાવા, ઉપસરપંચ વિનોદભાઈ વસાવા, તાલુકા પંચાયત પ્રમુખ રીનાબેન વસાવા, મામલતદાર ઝઘડિયા તથા અન્ય અધિકારીઓની ઉપસ્થિતિમાં સેવાસેતુ કાર્યક્રમ યોજાયો હતો. આજના આ કાર્યક્રમમાં મોટી સંખ્યામાં ઉપસ્થિત નાગરિકોના વિવિધ કામોનો સ્થળ પર નિકાલ કરવાની કામગીરી હાથ ધરવામાં આવશે. હવે પછી એકએક મહિનાના અંતરે તાલુકામાં અન્ય સ્થળોએ બીજા પાંચ સેવાસેતુ કાર્યક્રમો યોજાનાર છે.
ગુલામહુશેન ખત્રી રાજપારડી જિ.ભરૂચ
