ભરૂચ જીલ્લાના ઝઘડિયા તાલુકાની એક વિધવા યુવતીએ તેના પ્રેમી સાથે પ્રેમ સંબંધ રાખવાની ના પાડતા તેના પ્રેમીએ તેને મારમારી મારી નાંખવાની ધમકી આપતા યુવતીએ તેના પ્રેમી વિરુધ્ધ પોલીસમાં ફરિયાદ આપી હતી.
આ અંગે પ્રાપ્ત વિગતો મુજબ આ બે સંતાનની માતા એવી યુવતીનો પતિ છેલ્લા આઠેક મહિનાથી મરણ પામેલ છે. ત્યારબાદ આ યુવતીને ઉમેશ રાજુભાઇ વસાવા રહે.ઝઘડિયાના સાથે પ્રેમ સંબંધ બંધાયો હતો. છેલ્લા પંદરેક દિવસથી યુવતીએ ઉમેશ સાથે સંબંધ રાખવાની ના પાડી હતી. દરમિયાન ગત તા.૧ લીના રોજ યુવતી ઘર બહાર નીકળી હતી ત્યારે ઉમેશ મોટરસાયકલ લઇને ત્યાં આવી ચડ્યો હતો. ઉમેશે યુવતીને કહ્યુ હતુ કે મારો ફોન કેમ ઉઠાવતી નથી અને મારી સાથે કેમ સંબંધ રાખતી નથી? એમ કહીને યુવતીને રસ્તાની બાજુમાં ખેંચી જઇને ઝપાઝપી કરીને નીચે પાડી દીધી હતી, અને ઢિકાપાટુનો માર મારવા લાગ્યો હતો. યુવતીએ બુમાબુમ કરતા માણસો ભેગા થઇ જતા ઉમેશ મારી સાથે સંબંધ નહિ રાખેતો તને મારી નાંખીશ એમ ધમકી આપીને જતો રહ્યો હતો. તેમજ બીજા દિવસે પણ યુવતી પાસે આવીને તેને માર માર્યો હતો. આ સંદર્ભે યુવતીએ ઉમેશ વસાવા વિરુધ્ધ પોલીસમાં ફરિયાદ લખાવી હતી.
ગુલામહુશેન ખત્રી રાજપારડી જી.ભરૂચ
