ભરૂચ જિલ્લાનાં ઝઘડીયા તાલુકાનાં રાજપારડી નજીક અવિધા તરફ જવાના રસ્તા પર ભુંડવા ખાડી પાસે પાર્ક કરેલ મોટરસાયકલ સાથે અન્ય મોટરસાયકલ અથડાતા એક ઇસમને ગંભીર ઇજા થતા તેને પ્રાથમિક સારવાર બાદ વધુ સારવાર માટે ભરૂચ સીવીલ હોસ્પિટલમાં લઇ જવાયો હતો. રાજપારડી પોલીસમાંથી મળતી વિગતો મુજબ ઝઘડીયા ખાતે રહેતો કેવલભાઇ મુકેશભાઇ વસાવા નામનો યુવાન તેના મોટાભાઇ અનીલભાઇ અને બે વર્ષના પુત્ર સાથે મોટરસાયકલ લઇને પાણેથા ગામે લગ્નમાં ગયા હતા. ત્યાંથી પાછા ફરતા રાજપારડી થઇ અવિધા ગામ તરફ જવાના રસ્તે ભુંડવા ખાડીથી થોડેક દુર મોટરસાયકલ રોડની સાઇડમાં ઉભી રાખીને પેશાબ કરવા ગયા હતા અને કેવલ ગાડી ઉપર બેઠેલ હતો તે સમયે રાજપારડી તરફથી આવતી એક મોટરસાયકલ ઉભેલ મોટરસાયકલ સાથે ધડાકાભેર અથડાતા કેવલને ઘુંટણ નીચેના ભાગે જમણા પગે ફેકચર થવા પામેલ. ઇજાગ્રસ્ત ઇસમને પ્રાથમિક સારવાર બાદ વધુ સારવારની જરૂર જણાતા તેને ભરૂચ સીવીલ હોસ્પિટલ ખાતે લઇ જવાયો હતો. આ બનાવ અંગે કેવલભાઇ મુકેશભાઇ વસાવા રહે.ગામ ઝઘડીયાની ફરિયાદ મુજબ રાજપારડી પોલીસે ગુનો નોંધી તપાસ હાથ ધરી હતી.
ગુલામહુશેન ખત્રી રાજપારડી જિ.ભરૂચ
