ભરૂચ જિલ્લાના ઝઘડીયાની એક કંપનીમાં સિક્યુરીટીમાં નોકરી કરતી એક મહિલાને કંપનીમાં નોકરી કરતા એક સાથી કર્મચારી દ્વારા ખરાબ ઇરાદાથી છેલ્લા છ સાત મહિનાથી ગંદી હરકતો કરીને ત્રાસ અપાતા મહિલાએ આ ઇસમ દ્વારા કરાતી રોજિંદી અભદ્ર હરકતોથી વાજ આવીને ઝઘડીયા પોલીસમાં ફરિયાદ લખાવી છે.
મળતી વિગતો મુજબ આ મહિલા ઝઘડીયાની એક કંપનીમાં કામ કરે છે. કંપનીમાં ઓપરેટર તરીકે કામ કરતો ગોવાલી તા.ઝઘડીયાનો કલ્પેશ રોહિત નામનો ઇસમ મોબાઇલ ફોન કાન પર રાખીને ખરાબ ઇરાદાથી અભદ્ર ભાષા બોલે છે. તેમજ આ મહિલા કંપનીની અંદર પ્લાન્ટમાં રાઉન્ડ મારવા જાય ત્યારે પણ ખરાબ હરકત કરે છે. ઉપરાંત અન્ય કામદારો આગળ પણ મહિલાની ખરાબ વાતો કરે છે. ઉપરાંત પોલીસ ફરિયાદ કરીશ તો તને જોઇ લઇશ, એવી ધમકી આપતો આ ઇસમ પોતાની લાજ લેવાના ઇરાદાથી આવી ગંદી હરકતો કરતો હોવાની શંકા સાથે પીડિત મહિલાએ આ ઇસમ વિરુદ્ધ ઝઘડીયા પોલીસમાં ફરિયાદ લખાવતા પોલીસે ગુનો નોંધી તપાસ હાથ ધરી હતી.
ગુલામહુશેન ખત્રી રાજપારડી જિ.ભરૂચ
