ભરૂચ જિલ્લાના ઝઘડિયા તાલુકાના ગોવાલી ગામેથી પોલીસે રૂ. ૧,૫૪,૪૮૦ ના મુદ્દામાલ સાથે બે ઇસમોને ઝડપી લીધા હતા. મળતી વિગતો મુજબ ગતરોજ ઝઘડિયા પોલીસને ખરચી બીટ વિસ્તારમાં પેટ્રોલિંગ સમય દરમિયાન બાતમી મળી હતી કે ભરૂચ તરફથી બે ઈસમો એક ઓટો રિક્ષામાં આવીને ગોવાલી મહાકાળી નગરની સામેના ભાગે હનુમાનજીના મંદિર બહાર ઓટલા પર બેસીને સટ્ટા બેટિંગનો આંકડાનો જુગાર રમાડે છે. ઝઘડિયા પી.આઇ.વસાવા અને પોલીસ સ્ટાફે બાતમીની જગ્યાએ છાપો મારતા બે ઈસમો ઓટલા પર બેસેલ હતા. પોલીસને જોઇને બંને ઈસમો ઉભા થઈ જતા હતા ત્યારે તેઓને રોકીને અંગજડતી કરવામાં આવી હતી. તપાસ દરમિયાન બંને ઈસમો પાસેથી રોકડા રૂ. ૯૧,૪૮૦ બે મોબાઈલ અને ઓટોરિક્ષા મળીને કુલ રૂપિયા ૧,૫૪,૪૮૦ નો મુદ્દામાલ પોલીસે જપ્ત કર્યો હતો. ઝઘડિયા પોલીસે નીતિન વિનાયકરાવ આબનાવી રહે. દહેજ બાયપાસ રોડ ભરૂચ તેમજ મોહંમદ સાદિક અબ્દુલમજીદ મલેક રહે. આંબોલી રોડ અંકલેશ્વરના વિરુદ્ધ ગુનો નોંધીને કાયદેસર કાર્યવાહી હાથ ધરી હતી.
ગુલામહુશેન ખત્રી રાજપારડી જિ.ભરૂચ
