ભરૂચ જિલ્લાના અંતરિયાળ વિસ્તારોમાં પથ્થર તોડવાની અનેક ખાણ આવી છે, ઝઘડીયા તાલુકાના ગ્રામ્ય વિસ્તારોમાં આ ખાણનું પ્રમાણ વધુ છે, જ્યાં ગતરોજ મોટા સોરવા ગામની પત્થરની ખાણમાં એક દુર્ઘટના બની હતી જેમાં બ્લાસ્ટીંગ દરમિયાન પત્થર વાગતા કિરણ વસાવા નામના કામદારનું મોત થયું હોવાનું સામે આવ્યું છે.
બનાવની પ્રાપ્ત માહિતી અનુસાર ઝઘડીયા તાલુકાના મોટા સોરવા ગામની સીમમાં આવેલ પથ્થરની ખાણમાં કામ કરતા કામદાર કિરણ વસાવાનું પથ્થરની ખાણમાં બ્લાસ્ટ સમયે પથ્થર ઉછળીને વાગતા ગંભીર ઇજાઓ થતા તેનું સારવાર દરમિયાન મોત નીપજ્યું હોવાના આક્ષેપ કિરણ વસાવાની પત્ની સરોજબેન વસાવા દ્વારા કરવામાં આવ્યા હતા.
ઘટના અંગેની જાણ રાજપારડી પોલીસને કરવામાં આવતા પોલીસે કિરણ વસાવાના મૃતદેહને પોસ્ટમોર્ટમ અર્થે ભરૂચ સિવિલ હોસ્પિટલ ખાતે ખસેડી મામલા અંગેનો ગુનો દાખલ કરવાની તજવીજ હાથધરી વધુ તપાસ શરૂ કરી છે.
