ભરૂચ : જિલ્લા કક્ષાના ૭૬ માં સ્વાતંત્ર્ય પર્વની ઉજવણીની તૈયારીઓને આખરી ઓપ અપાયો.

દેશની આઝાદીના અમૃત વર્ષના ઉપક્રમે દેશભરમાં ૭૬ માં સ્વતંત્રતા પર્વની હર્ષભેર ઉજવણી થનાર છે. ભરૂચ જિલ્લામાં પણ આ અંતર્ગત જિલ્લા કક્ષાના કાર્યક્રમની ઉજવણી જિલ્લા કલેકટર તુષાર સુમેરાની ઉપસ્થિતિમાં કરવામાં આવશે.

આ અંગેનો કાર્યક્રમ સોમવારના રોજ સવારના ૯-૦૦ વાગ્યે જે એમ શાહ સાયન્સ કોલેજ, જંબુસર ખાતે યોજવામાં આવશે. આ પ્રસંગે જિલ્લામાં શ્રેષ્ઠ કામગીરી કરનાર અધિકારીઓ અને કર્મચારીઓનું સન્માન તથા અભિવાદન પણ કરવામાં આવશે. ગણવેશ ધારી પોલીસ દળના જવાનો રાષ્ટગીતની સૂરાવલીઓ વચ્ચે રાષ્ટ્રધ્વજને સલામી આપશે. આ અવસરે શાળાના બાળકો દ્વારા યોગ નિદર્શન અને સાંસ્કૃતિક કાર્યક્રમોની પ્રસ્તુતિ કરવામાં આવશે.

આજે અધિક નિવાસી કલેક્ટર જે ડી પટેલનાં માર્ગદર્શન હેઠળ આ અંગે યોજાનાર કાર્યક્રમનું રિહર્સલ અને નિદર્શન કરવામાં આવ્યું હતું. આ વર્ષે પણ કોરોનાને અનુલક્ષીને લઇ સ્ટાન્ડર્ડ ઓપરેટીંગ પ્રોસીજર અનુસાર સ્વાતંત્ર્ય પર્વની ઉજવણી કરવામાં આવશે. આજે સવારે યોજાયેલ રિહર્સલ કાર્યક્રમમાં જિલ્લાના ઉચ્ચ અધિકારીઓ સહિત પોલીસ દળના જવાનો ઉપસ્થિત રહ્યાં હતાં.