દૂધધારા ડેરી ચૂંટણી જંગ : ઘનશ્યામના ઘરાબાની જીત, અરૂણસિંહનો અહમ પરાસ્ત

ડેરીની ૧૫ બેઠક પૈકી ઘનશ્યામ પટેલની પેનલના ૧૦, અરૂણસિંહની પેનલના ૨, અપક્ષના ૩ જીત્યા

મહત્વકાંક્ષી વ્યક્તિએ અમારા સાથીઓને ગેરમાર્ગે દોરવ્યાં હતાં

ભરૂચ દૂધધારાની ચૂંટણીની ૧૧ બેઠકની ચૂંટણીમાં અમારી જે જીત થઈ છે તે ભાજપની જીત છે અને અમારી ડેરીના તમામ પશુપાલક મિત્રો અને ખાતેદારો તથા સભાસદોના વિશ્વાસની જીત છે. મેન્ડેડની ભૂમિકા રહી છે. સાથે સાથે મતદારો સાથેનો વર્ષોના સંબંધો સહિતના પાસાઓનો પણ પ્રભાવ હતો. અસ્તિત્વનો પ્રશ્ન હતો નહી, પરંતુ કેટલાંક મહત્વકાંક્ષી લોકોએ અમારા સાથીઓને ગેરદોરવણી કરી છે. - ધનશ્યામ પટેલ, ચેરમેન, દૂધધારા ભરૂચ

મારા કોન્ફિડન્સમાં કોઈ ફેર પડ્યો નથી

સાંસદ મનસુખ વસાવાએ જે કહ્યું હતું કે, જે રૂપિયા ખર્ચો કરે તે જીતશે. ત્યારે ધનશ્યામ પટેલ માત્ર બે મતથી તેમની બેઠક પર જીત્યાં છે. અને અન્ય કેટલીંક સીટો પર પણ બે-ત્રણ મતનો જ ફેર છે. એટલે હું જીતેલો જ છું. પશુપાલકો મારી સાથે હ્રદયથી રહ્યાં છે, આજે મારી જે સીટો બે-ત્રણ મતથી જ હાર્યા હોય તો તેના પર આત્મશોધ કરીને આગામી દિવસોમાં પણ અમે લડત આપીશું જ. અરૂણસિંહ રણા, ધારાસભ્ય, વાગરા.

વહીવટી તંત્રના કૂનેહથી ચૂંટણી શાંતીમય રીતે પૂર્ણ

ચૂંટણીની જાહેરાતથી માંડી મત ગણતરી સુધી વહિવટી તંત્રની કામગીરી પણ સરાહનિય રહી હતી. ભાજપના જ બે માધાંતાઓ વચ્ચેની જંગને લઈને વિહવટી તંત્રની પરીક્ષા લેવાઈ હતી. દૂધધારા ડેરીની ચૂંટણીની જાહેરાત કરવા સાથે, મતદાનના ઝોન પાડવાના હોય કે ચૂંટણીની આચારસંહિતા સહિત મતદાન અને મતગણતરી સુધીની કામગીરી નિષ્પક્ષ અને ન્યાયિક રીતે પૂર્ણ થાય તે માટે ચૂંટણી વિભાગે વિહવટી કૂનેહતા વાપરીને સમગ્ર ચૂંટણી પાર પાડી હતી.

મહેશ વસાવાના ૩ અપક્ષ સાથી જીત્યા, જાતે હાર્યા

દૂધધારા ડેરીની ચૂંટણીમા મહેશ વસાવાએ પણ જાતે એક બેઠક પર અને અન્ય ત્રણ સાથીઓને અપક્ષમાં ચૂંટણી જંગમાં ઉતયાં હતાં. તેમના ત્રણેય અપક્ષ ઉમેદવારો જીતી ગયાં હતાં. જોકે, એસટી અનામતની બેઠક માટેની ચૂંટણીમાં તેમની સામે અરૂણસિંહ રણાનો ઉમેદવાર અને ભાજપના મેન્ડેડના કારણે ધનશ્યામ પટેલનો ઉમેદવાર પણ ઉતયાં હતાં. જેના પગલે ભાજપના જ બે નેતાઓના ઉમેદવારો વચ્ચે મતો વેચાઈ જતાં મહેશ વસાવાના મત ઘટતા તેમની હાર થઈ હતી.

અરૂણસિંહના એક બિનહરીફ સહિત માત્ર બે જ ઉમેદવારો જીત્યા

ભાજપના મેન્ડેડ સામે બળવો કરીને અરૂણસિંહ રણાએ પોતાની પેનલ ઉતારી હતી. ધનશ્યામથી છેડો ફાડીને જીતેશ પટેલ આણી પાર્ટી અરૂણસિંહની પાટલી પર બેસી ગયાં હતાં. બીજી તરફ ધનશ્યામ પટેલ સામે આક્ષેપો કરવા સાથે તમામ બેઠકો પર પોતાના ઉમેદવારો ઊભા રાખ્યા હતાં. ભાજપના મેન્ડેડના કારણે પ્રકાશ દેસાઈ ઉમલા બેઠક પર બિનહરીફ જીત્યા હતાં. જોકે, ચૂંટણીમાં માત્ર એસટી અનામત સીટ પર તેમની એક ઉમેદવાર જીતી હતી. જોકે, તેમાં પણ મતદારો ત્રણભાગમાં વેચાતા તે જીત્યાં હોવાનું મનાય છે.

વાગરામાં ૩૫ વર્ષથી જીતતા ઉમેદવારને હરાવ્યો

દૂધધારા ડેરીમાં ૩૫ વર્ષથી ડિરેક્ટર બનતાં હેમંતસિંહ રાજે ધનશ્યામ સામે બળવો કરી અરૂણસિંહની છત્રછાયામાં જતાં રહેતાં ઘનશ્યામ પટેલે સંજયકુમાર રાજને પહેલવાર ઉમેદાવરી સોંપી હતી. ત્યારે ચૂંટણીમાં બન્ને ઉમેદવારોને ૧૩-૧૩ મત મળતા ટાઈ પડી હતી જેના પગલે સંલગ્ન અધિકારીઓએ બહારથી ખ્રિયા નામની એક બાળકીને લાવી તેના હસ્તે ચિઠ્ઠી ઉપાડી હતી. જેમાં સંજયસિંહ રાજનો વિજય થયો હતો.