અંકલેશ્વર GIDC વિસ્તારમાં ગેરકાયદેસર રીતે મેફેડ્રોન (MD) ડ્રગ્સ બનાવતી લેબનો ભંડાફોડ થયો છે. ભરૂચ SOGની ટીમે રહેણાંક વિસ્તારમાં આવેલી સિદ્ધ કો.ઓ. હા. સોસાયટીના બી બ્લોકમાં આવેલા ભાડાના મકાન નંબર 301 પર ચોક્કસ બાતમીના આધારે દરોડો પાડી કાર્યવાહી હાથ ધરી હતી.
દરોડા દરમિયાન મકાનના બાથરૂમમાં જ ડ્રગ્સ બનાવવાની વ્યવસ્થા ઉભી કરવામાં આવી હોવાનું બહાર આવ્યું. પોલીસને સ્થળ પરથી અંદાજે 70 ગ્રામ તૈયાર મેફેડ્રોન (MD) ડ્રગ્સ તેમજ નોંધપાત્ર માત્રામાં કાચો માલ મળી આવ્યો હતો, જેને જપ્ત કરવામાં આવ્યો છે.
આ પ્રકરણમાં ફાર્મા કંપનીમાં કેમિસ્ટ તરીકે કાર્યરત અનિલ રાખોલિયા નામના વ્યક્તિની ધરપકડ કરવામાં આવી છે. પ્રાથમિક તપાસમાં જાણવા મળ્યું છે કે આરોપી પોતાની ટેકનિકલ કુશળતા અને રસાયણિક જ્ઞાનનો દુરુપયોગ કરી ગેરકાયદેસર રીતે ડ્રગ્સનું ઉત્પાદન કરતો હતો.
ભરૂચ SOG દ્વારા હાથ ધરાયેલી આ કામગીરી બાદ આરોપી સામે NDPS એક્ટ હેઠળ ગુનો નોંધવાની કાર્યવાહી શરૂ કરવામાં આવી છે. સાથે જ ડ્રગ્સના પુરવઠા નેટવર્ક અને અન્ય સંડોવાયેલા શખ્સોની શોધખોળ માટે વધુ તપાસ તેજ કરવામાં આવી છે.
