જંબુસર ટાઉનમાં વીજ કેબલ ચોરીના બનાવો ફરી એકવાર સામે આવતા વીજ વિભાગને મોટો ઝટકો લાગ્યો છે. અગાઉ ડાભા ચોકડીથી ગજેરા ગામ તરફ જતાં માર્ગ પર 41 ગાળાના કેબલો તસ્કરો કાપી લઈ ગયા હતા, જેના કારણે વિસ્તારમાં વીજ પુરવઠા પર અસર પડી હતી.
આ બનાવ બાદ ફેબ્રુઆરી મહિનાના અંતમાં વીજ વિભાગ દ્વારા સમારકામ કરીને એગ્રીકલ્ચર લાઈન પર નવા કેબલો નાખવામાં આવ્યા હતા. પરંતુ થોડા જ સમયમાં ફરી ચોરીની ઘટના બનતા ચિંતા વધવા પામી છે.
મળતી માહિતી મુજબ, 11 કેએવી વાવલી ફીડરની હાઈ પ્રેશર વીજ લાઈનના 29 પોલ ઉપર લગાવેલા તારો કપાઈ ગયેલા જોવા મળ્યા હતા. તસ્કરો દ્વારા કુલ 3480 મીટર એલ્યુમિનિયમ વીજ કેબલ, જેની અંદાજિત કિંમત ₹1.32 લાખ છે, ચોરી કરી લેવામાં આવ્યા છે.
આ મામલે જુનિયર ઇજનેરે જંબુસર પોલીસ મથકે ફરિયાદ નોંધાવી છે. પોલીસે ગુનો દાખલ કરી અજાણ્યા તસ્કરો સામે તપાસ શરૂ કરી છે અને વિસ્તારમાં પેટ્રોલિંગ વધારવામાં આવ્યું છે.
