ભરૂચ :
ઝઘડીયા ખાતે ઔદ્યોગિક એકમોની સલામતી અને આપત્તિ વ્યવસ્થાપનની તૈયારીઓનો જીવંત નજારો જોવા મળ્યો, જ્યાં આરતી ઇન્ડસ્ટ્રીઝ અને લોકલ ક્રાઇસીસ ગ્રુપના સંકલનમાં ઓફ-સાઇટ ઇમરજન્સી મોકડ્રિલ યોજાઈ હતી.
મોકડ્રિલ દરમિયાન આરતી ઇન્ડસ્ટ્રીઝના રૂબી યુનિટ-ઝોન-૨ના પેટ્રોલિયમ સ્ટોરેજ વિસ્તારમાં ટેન્કર રિફિલિંગ દરમ્યાન સોલ્વન્ટ લીકેજ થવાથી સ્ટેટિક ચાર્જના કારણે અચાનક ‘ફ્લેશ ફાયર’ સર્જાયું હોવાનું દૃશ્ય ઉભું કરવામાં આવ્યું. શરૂઆતમાં પોર્ટેબલ ફાયર ટેન્ડર દ્વારા આગને કાબૂમાં લેવાનો પ્રયાસ કરવામાં આવ્યો હતો, પરંતુ ફરીથી સોલ્વન્ટ સળગતાં પરિસ્થિતિ વિકટ બની અને લેવલ-૩ ઇમરજન્સી જાહેર કરવાની સ્થિતિ ઊભી થઈ.
આ બનાવ સંપૂર્ણપણે પૂર્વનિયોજિત મોકડ્રિલનો ભાગ હતો, જેના માધ્યમથી મેજર એક્સિડન્ટ હેઝાર્ડસ (MAH) ધરાવતા ઉદ્યોગોમાં આકસ્મિક પરિસ્થિતિમાં પરસ્પર સંકલન અને પ્રતિસાદ ક્ષમતાનો અભ્યાસ કરવામાં આવ્યો.
તાત્કાલિક પ્રતિસાદ અને બચાવ કામગીરી
ઘટનાની જાણ થતાં જ પ્લાન્ટ સુપરવાઇઝરે કંપનીનો ઇમરજન્સી પ્લાન સક્રિય કર્યો. સ્થાનિક ફાયર ટીમે ફાયર હાઇડ્રન્ટ અને ફાયર ટેન્ડર દ્વારા આગ કાબૂમાં લેવાનો પ્રયાસ કર્યો. પરિસ્થિતિ ગંભીર બનતાં વહીવટી તંત્ર અને આસપાસના ઉદ્યોગોની ફાયર બ્રિગેડને મદદ માટે બોલાવવામાં આવ્યા, જેઓએ અંતે આગ પર સંપૂર્ણ કાબૂ મેળવ્યો.
વોર્ડન સેવા, પોલીસની ફર્સ્ટ રિસ્પોન્ડર ટીમો, ફર્સ્ટ એઇડ પાર્ટી, હાઉસ ફાયર પાર્ટી અને રેસ્ક્યુ ટીમોએ ઘટના સ્થળે પહોંચી તાત્કાલિક રાહત-બચાવ કામગીરી શરૂ કરી. બે કામદારોને સુરક્ષિત સ્થળે ખસેડવામાં આવ્યા, જ્યારે ઘાયલ થયેલાઓને ઓન-સાઇટ હોસ્પિટલમાં પ્રાથમિક સારવાર આપવામાં આવી.
તાલીમ અને સમીક્ષા
મોકડ્રિલ પહેલાં અધિકારીઓ અને કર્મચારીઓ માટે ટેબલ-ટોપ એક્સરસાઇઝ યોજાઈ હતી. મોકડ્રિલ પૂર્ણ થયા બાદ ડી-બ્રિફિંગ સત્રમાં પાંચ જુદી જુદી ટીમો દ્વારા કામગીરી અંગે હકારાત્મક અને સુધારાત્મક સૂચનો રજૂ કરવામાં આવ્યા.
પ્રાંત અધિકારી ડૉ. પંકજ વલવાઈએ મોકડ્રિલ દરમિયાન લેવાયેલા નિર્ણયો અને કામગીરીની પ્રશંસા કરી અને તમામ એજન્સીઓના સંકલનને સરાહનીય ગણાવ્યું.
આ મોકડ્રિલમાં ઝઘડીયા મામલતદાર એન.સી. રાણા, જીપીસીબીના અધિકારીઓ સહિત વિવિધ વિભાગોના અધિકારીઓ હાજર રહ્યા હતા.
