અંકલેશ્વરના કોસમડી નજીક આવેલા એપલ પ્લાઝા સ્થિત રાજહંસ સિનેમામાં બુધવારે ચાલુ ફિલ્મ દરમિયાન ભીષણ આગ લાગતા અફરાતફરીનો માહોલ સર્જાયો હતો. સિનેમાની સ્ક્રીન નંબર-3માં અચાનક આગ ભભૂકી ઉઠતા હોલમાં હાજર લોકોમાં નાસભાગ મચી ગઈ હતી. આગની ઘટનામાં સ્ક્રીન નંબર-3નો સમગ્ર હિસ્સો બળીને ખાક થઈ ગયો હતો.
મળતી માહિતી મુજબ, ફિલ્મ ચાલી રહી હતી તે દરમિયાન સ્ક્રીન નંબર-3માં આગ લાગી હતી. આગે જોતજોતામાં વિકરાળ સ્વરૂપ ધારણ કરતાં સિનેમા હોલમાં દોડધામ મચી ગઈ હતી. દરમિયાન બે લોકો આગની વચ્ચે અંદર ફસાઈ ગયા હતા. ઘટનાની ગંભીરતાને પગલે તાત્કાલિક રેસ્ક્યૂ ઓપરેશન હાથ ધરવામાં આવ્યું હતું અને બંને લોકોને સલામત રીતે બહાર કાઢવામાં આવ્યા હતા.
આગની જાણ થતાં સિનેમાનો વીજ પુરવઠો તાત્કાલિક બંધ કરી દેવામાં આવ્યો હતો. બીજી તરફ ફાયર વિભાગની ટીમો પણ તાત્કાલિક ઘટનાસ્થળે દોડી આવી હતી. ત્રણ ફાયર ટેન્ડરની મદદથી ફાયર જવાનોએ આશરે બે કલાક સુધી ભારે જહેમત કરી આગ પર કાબૂ મેળવ્યો હતો.
ઘટનાની ગંભીરતાને પગલે ડી.વાય.એસ.પી. ડૉ. કુશલ ઓઝા સહિતના પોલીસ અધિકારીઓ પણ ઘટનાસ્થળે પહોંચ્યા હતા અને સમગ્ર સ્થિતિની સમીક્ષા કરી હતી. આગના કારણે સિનેમાના સ્ક્રીન નંબર-3માં મોટું નુકસાન થયું હોવાનું સામે આવ્યું છે.
હાલ આગ કયા કારણોસર લાગી તે અંગે તપાસ હાથ ધરવામાં આવી છે. સદનસીબે રેસ્ક્યૂ કરાયેલા બંને લોકોને સલામત રીતે બહાર કાઢી લેવામાં આવતા મોટી જાનહાનિ ટળી હતી.
