ભરૂચ : ભરૂચ જિલ્લામાં સાયબર ઠગાઈના બે અલગ-અલગ બનાવોમાં નિવૃત્ત શિક્ષક અને વેપારીને નિશાન બનાવી ગઠિયાઓએ રૂ.55 લાખથી વધુની રકમની છેતરપિંડી આચર્યાની ફરિયાદ સાયબર ક્રાઇમ પોલીસ મથકે નોંધાઈ છે. એક બનાવમાં શેરબજારમાં રોકાણથી ઊંચો નફો કમાવવાની લાલચ આપી નિવૃત્ત શિક્ષક પાસેથી લાખો રૂપિયા પડાવાયા હતા, જ્યારે બીજા બનાવમાં વેપારી અને તેમના ભાગીદારોના જોઈન્ટ કરન્ટ એકાઉન્ટમાં ઓનલાઈન એક્સેસ મેળવી લાખો રૂપિયા અન્ય ખાતામાં ટ્રાન્સફર કરી લેવાયા હતા.
ભરૂચ તાલુકાના દેરોલ ગામના નિવૃત્ત શિક્ષક અશ્વિનકુમાર પટેલે ફેસબુક પર શેરબજારમાં રોકાણની જાહેરાત જોઈ હતી. જાહેરાતની લિંક ઓપન કરતાં સંપર્કમાં આવેલા શખ્સે પોતે BXB માર્કેટનો એકાઉન્ટ મેનેજર હોવાનું જણાવી ટેલીગ્રામ ગ્રુપ મારફતે ટ્રેડિંગ આઈડી ખોલાવી હતી. ત્યારબાદ અલગ-અલગ બેંક ખાતામાં કુલ રૂ.48.83 લાખ જમા કરાવ્યા હતા. જોકે, માત્ર રૂ.22 હજાર પરત આપ્યા બાદ વધુ રૂ.17 લાખની માંગણી કરતાં શિક્ષકને ઠગાઈનો અહેસાસ થયો હતો. તેમણે 1930 પર ફરિયાદ કરતાં પોલીસે રૂ.10.77 લાખ ફ્રીઝ કરાવ્યા છે.
બીજા બનાવમાં અંકલેશ્વરના રેડીમિક્સ કોંક્રિટના વેપારી જયેશકુમાર દેસાઈ અને તેમના ભાગીદારોના ICICI તથા HDFC બેંકના જોઈન્ટ કરન્ટ એકાઉન્ટમાં અજાણ્યા શખ્સોએ ઓનલાઈન એક્સેસ મેળવી કુલ રૂ.6.40 લાખ ટ્રાન્સફર કરી લીધા હતા. મોબાઈલ પર OTP સંબંધિત મેસેજ આવ્યા બાદ વેપારીએ તપાસ કરતાં સમગ્ર મામલો બહાર આવ્યો હતો. બંને બનાવોમાં ભરૂચ સાયબર ક્રાઇમ પોલીસે તપાસ શરૂ કરી ગઠિયાઓ સુધી પહોંચવા કવાયત હાથ ધરી છે.
