વાંકલ :
સુરત જિલ્લામાં લાંબા વિરામ બાદ હવામાનમાં અચાનક પલટો આવ્યો છે અને મેઘરાજાએ ધમાકેદાર એન્ટ્રી કરી છે. ખાસ કરીને માંગરોળ તાલુકામાં આકાશમાં વીજળીના કડાકા-ભડાકા અને તીવ્ર ચમકારા સાથે ધોધમાર વરસાદ વરસતા સમગ્ર પંથકમાં ઠંડક પ્રસરી ગઈ હતી. લાંબા સમયથી વરસાદની રાહ જોઈ રહેલા ગ્રામજનો અને ખેડૂતોમાં મેઘમહેરથી ખુશીની લહેર ફરી વળી છે.
વરસાદ પડતાં જ વાતાવરણમાં આહલાદક ઠંડક પ્રસરી હતી. બફારા અને ગરમીથી ત્રસ્ત લોકોને પણ રાહત મળી હતી. ખેતરોમાં વરસાદી પાણી પહોંચતાં સુકાઈ રહેલા પાકને નવું જીવન મળ્યું છે.
પાકને મળ્યું સંજીવની સમાન જીવતદાન
છેલ્લા કેટલાક સમયથી વરસાદ ખેંચાતા ખેડૂતોના ખરીફ પાક પર સંકટના વાદળો ઘેરાયા હતા. અનેક ખેતરોમાં પાક સુકાવાના આરે પહોંચ્યો હતો. આવી સ્થિતિમાં મેઘરાજાની ધમાકેદાર એન્ટ્રીએ ખેડૂતોને મોટી રાહત આપી છે. વરસાદના કારણે જમીનમાં ભેજ વધતા ઊભા પાકને ફાયદો થવાની આશા ખેડૂતોમાં જાગી છે.
માંગરોળ તાલુકાના ગ્રામ્ય વિસ્તારોમાં વરસાદના પગલે ખેતરોમાં ચહલપહલ વધી હતી અને ખેડૂતોના ચહેરા પર રાહત તથા ખુશીની લાગણી જોવા મળી હતી. આગામી દિવસોમાં પણ વરસાદી માહોલ યથાવત રહે અને સારો વરસાદ વરસે તેવી આશા ખેડૂત આલમ રાખી રહ્યું છે.
