ભરૂચ :
મુંબઈના નરીમન પોઈન્ટ ખાતે WNBF (વર્લ્ડ નેચરલ બોડી બિલ્ડિંગ ફેડરેશન) દ્વારા આંતરરાષ્ટ્રીય બોડી બિલ્ડિંગ સ્પર્ધાનું આયોજન કરવામાં આવ્યું હતું. ભારત સહિત વિવિધ દેશોમાંથી 350થી વધુ બોડી બિલ્ડરોએ આ સ્પર્ધામાં ભાગ લીધો હતો. જેમાં ભરૂચના ત્રણ યુવાનોએ ભાગ લઈ શહેરનું નામ આંતરરાષ્ટ્રીય મંચ પર રોશન કર્યું હતું.
ભરૂચના હાઉસ ઓફ બ્રોડઝિલ્લા જીમના હેડ કોચ ધવલ મહિડાના માર્ગદર્શન હેઠળ અમન કાનુંગા અને ફહાદ પટેલે જુનિયર મેન્સ ફિઝિક્સ કેટેગરીમાં ભાગ લીધો હતો. જ્યારે દિપક રાજપૂતે સિનિયર ઓપન બોડી બિલ્ડિંગ કેટેગરીમાં પોતાની પ્રતિભા દર્શાવી હતી.
સ્પર્ધામાં અમન કાનુંગાએ પોતાની કેટેગરીમાં પાંચમી પોઝિશન મેળવી મેડલ જીત્યો હતો. ત્રણેય યુવાનોએ આંતરરાષ્ટ્રીય સ્તરની સ્પર્ધામાં પોતાના શ્રેષ્ઠ પ્રદર્શનથી ભરૂચનું ગૌરવ વધાર્યું હતું.
કોચ ધવલ મહિડાએ જણાવ્યું હતું કે, આ સ્પર્ધા માટે ત્રણેય ખેલાડીઓએ છેલ્લા છ મહિનાથી સખત મહેનત કરી હતી. કઠોર વર્કઆઉટની સાથે કડક ડાયટનું પાલન કરી તેમણે સ્પર્ધા માટે તૈયારી કરી હતી. જેના પરિણામે તેઓ આંતરરાષ્ટ્રીય સ્પર્ધામાં ભાગ લેવા માટે ક્વોલિફાય થયા હતા.
તેમણે વધુમાં જણાવ્યું હતું કે, સ્પર્ધામાં જીત કે હાર કરતાં ભરૂચનું આંતરરાષ્ટ્રીય સ્તરે પ્રતિનિધિત્વ થાય તે મુખ્ય ઉદ્દેશ હતો, જેમાં ત્રણેય ખેલાડીઓએ પોતાનું શ્રેષ્ઠ પ્રદર્શન આપી સફળતા મેળવી છે.
