ભરૂચ :
માનવતાની સેવા અને સમાજોપયોગી પ્રવૃત્તિઓમાં અગ્રેસર રહેતી લાયન્સ ક્લબ ઓફ ભરૂચ દ્વારા ભરૂચ અને અંકલેશ્વર સહિતના વિસ્તારોમાં વિવિધ સ્થળોએ વિશાળ રક્તદાન કેમ્પનું આયોજન કરવામાં આવ્યું હતું. સેવાકીય પ્રવૃત્તિમાં રક્તદાતાઓએ ઉત્સાહભેર ભાગ લેતાં આશરે ૨૦૦ યુનિટ રક્ત એકત્રિત કરવામાં આવ્યું હતું.
લાયન્સ ક્લબ ઓફ ભરૂચ દ્વારા આયોજિત રક્તદાન કેમ્પ બોરભાઠા અંકલેશ્વર ખાતે આત્મીય ગ્રુપના સહયોગથી, દૂધધારા ડેરી ભરૂચ, કોલેજ રોડ સ્થિત પટેલ સમાજની વાડી તેમજ એ.પી.એમ.સી. ઝઘડિયા ખાતે યોજાયો હતો. ઝઘડિયા ખાતે યોજાયેલા કેમ્પમાં તાલુકાના પ્રાથમિક આરોગ્ય કેન્દ્ર (PHC)નો સહયોગ મળ્યો હતો.
આ સેવાકીય કાર્યક્રમમાં લાયન્સ ડિસ્ટ્રિક્ટના મુખ્ય હોદ્દેદારો ખાસ ઉપસ્થિત રહ્યા હતા. જેમાં લાયન્સ ડિસ્ટ્રિક્ટ ગવર્નર (DG) લાયન હેમલ પટેલ, પ્રથમ વાઇસ ડિસ્ટ્રિક્ટ ગવર્નર (1st VDG) લાયન પ્રિયંકા રાવલ જૈન અને GST ચેરપર્સન લાયન આભાજી સહિતના પદાધિકારીઓએ હાજરી આપી હતી.
રક્તદાન કેમ્પ દરમિયાન લાયન્સ ક્લબ ઓફ ભરૂચના સભ્યો દ્વારા ઉપસ્થિત આમંત્રિત મહેમાનોને મોમેન્ટો અર્પણ કરી ભાવભર્યું સન્માન કરવામાં આવ્યું હતું. આ પ્રસંગે ક્લબના હોદ્દેદારોએ રક્તદાન કેમ્પને સફળ બનાવવા માટે સહયોગી સંસ્થાઓ, રક્તદાતાઓ અને તમામ કાર્યકરોનો આભાર વ્યક્ત કર્યો હતો.
લાયન્સ ક્લબ દ્વારા યોજાયેલી આ સેવાકીય પ્રવૃત્તિ થકી રક્તની જરૂરિયાત ધરાવતા દર્દીઓ માટે ઉપયોગી બની શકે તેવા રક્તસંગ્રહમાં યોગદાન આપવામાં આવ્યું હતું. રક્તદાનને પ્રોત્સાહન આપતી આવી પ્રવૃત્તિઓ દ્વારા સમાજમાં માનવસેવા અને પરોપકારની ભાવનાને વધુ વેગ મળ્યો છે.
