અંકલેશ્વર ।
અંકલેશ્વરમાં ચોમાસાની વિદાય વચ્ચે આજે વહેલી સવારે વાતાવરણમાં અચાનક પલટો આવ્યો હતો. સવારથી જ શહેર અને આસપાસના વિસ્તારોમાં ગાઢ ધુમ્મસ છવાઈ જતાં સમગ્ર અંકલેશ્વર જાણે સફેદ ચાદરમાં ઢંકાઈ ગયું હોય તેવો નજારો જોવા મળ્યો હતો. ધુમ્મસના કારણે એક તરફ વાહનચાલકોને મુશ્કેલીનો સામનો કરવો પડ્યો હતો, તો બીજી તરફ શહેરનું વાતાવરણ ખુશનુમા બની ગયું હતું.
વહેલી સવારે અંકલેશ્વરના રસ્તાઓ, રહેણાંક વિસ્તારો અને ખુલ્લા મેદાનોમાં ગાઢ ધુમ્મસ છવાઈ ગયું હતું. ધુમ્મસની ચાદર વચ્ચે આસપાસનું દૃશ્ય ધૂંધળું બની જતાં મુખ્ય માર્ગો પર વાહનચાલકોને વિઝિબિલિટી ઘટવાની સમસ્યાનો સામનો કરવો પડ્યો હતો. કેટલાક વાહનચાલકો સાવચેતીના ભાગરૂપે હેડલાઇટ ચાલુ રાખીને વાહન ચલાવતા જોવા મળ્યા હતા.
ખાસ કરીને વહેલી સવારના સમયે રસ્તાઓ પર અવરજવર કરતા વાહનચાલકો માટે ગાઢ ધુમ્મસ પડકારરૂપ બન્યું હતું. ધુમ્મસના કારણે વાહનચાલકોએ સાવચેતીપૂર્વક વાહન ચલાવવાની ફરજ પડી હતી.
ધુમ્મસથી શહેરમાં હિલ સ્ટેશન જેવો માહોલ
બીજી તરફ, અંકલેશ્વરમાં છવાયેલા ગાઢ ધુમ્મસે વાતાવરણને મનમોહક બનાવી દીધું હતું. ઠંડકભર્યો માહોલ અને ચારે તરફ પથરાયેલી ધુમ્મસની સફેદ ચાદરના કારણે શહેરમાં જાણે હિલ સ્ટેશન જેવો નજારો સર્જાયો હતો.
ધુમ્મસથી ઢંકાયેલા રસ્તાઓ અને આસપાસના વિસ્તારોના મનમોહક દૃશ્યો સ્થાનિકો માટે આકર્ષણનું કેન્દ્ર બન્યા હતા. ચોમાસાની વિદાય વચ્ચે જોવા મળેલા આ બદલાયેલા વાતાવરણને કારણે સવારના સમયે બહાર નીકળેલા લોકોને પણ અનોખો અનુભવ થયો હતો. શહેરમાં ધુમ્મસના કારણે કુદરતી સૌંદર્યની અલગ જ છટા જોવા મળી હતી.
