ભરૂચ શહેર અને જિલ્લામાં માર્ગ સલામતી તથા ટ્રાફિક નિયમોના પાલન અંગે લોકોમાં જાગૃતિ ફેલાવવાના હેતુથી ભરૂચ જિલ્લા પોલીસ અને આરટીઓ કચેરી દ્વારા સંયુક્ત રીતે બાઇક રેલીનું આયોજન કરવામાં આવ્યું હતું. ‘સેવા સંકલ્પ અભિયાન-સેવા મારું યોગદાન’ અંતર્ગત યોજાયેલી આ રેલીમાં પોલીસ અધિકારીઓ-કર્મચારીઓ સહિત વિવિધ વિભાગના કર્મચારીઓ જોડાયા હતા.
ભરૂચ રેલવે સ્ટેશન ખાતેથી બાઇક રેલીનો પ્રારંભ કરવામાં આવ્યો હતો. આરટીઓ ઇન્સ્પેક્ટર આર.એલ. ચૌધરી, ટ્રાફિક પીએસઆઈ આર.આર. ગોહિલ તથા હિટ એન્ડ રન કમિટીના સભ્ય હેતલ શાહ સહિતના અધિકારીઓએ લીલી ઝંડી બતાવી રેલીને રવાના કરી હતી.
રેલવે સ્ટેશનથી શરૂ થયેલી બાઇક રેલી શહેરના વિવિધ મુખ્ય માર્ગો પરથી પસાર થઈ હોસ્ટેલ ગ્રાઉન્ડ ખાતે પહોંચી હતી. રેલી દરમિયાન માર્ગ સલામતી, હેલ્મેટના ઉપયોગ તથા ટ્રાફિક નિયમોનું પાલન કરવા અંગે લોકોને જાગૃત કરવામાં આવ્યા હતા.
આ જનજાગૃતિ અભિયાનમાં ટ્રાફિક પોલીસ, ટીઆરબી જવાનો, હોમગાર્ડ તેમજ આરટીઓ વિભાગના કર્મચારીઓ મોટી સંખ્યામાં જોડાયા હતા. રેલીના સમાપન બાદ હોસ્ટેલ ગ્રાઉન્ડ ખાતે ઉપસ્થિત અધિકારીઓ, પોલીસકર્મીઓ, કર્મચારીઓ અને નાગરિકોએ માર્ગ સલામતી તથા ટ્રાફિક નિયમોનું કડક પાલન કરવાનો સામૂહિક શપથ લીધો હતો.
