વાંકલ :
ગુજરાત સરકાર દ્વારા આયોજિત રમતગમતના મહાકુંભ સમા **‘ખેલ મહાકુંભ’**માં માંગરોળ તાલુકા કક્ષાની ખો-ખો સ્પર્ધામાં PM શ્રી બોરસદ દેગડીયા શાળાના વિદ્યાર્થીઓએ ઉત્કૃષ્ટ પ્રદર્શન કરી શાળાનું નામ રોશન કર્યું છે.
તાલુકા કક્ષાની ખો-ખો સ્પર્ધામાં શાળાની અંડર-17 કન્યાઓની ટીમે દ્વિતીય ક્રમ મેળવી શાનદાર સફળતા હાંસલ કરી છે. આ સાથે ટીમની જિલ્લા કક્ષાની સ્પર્ધા માટે પસંદગી થતાં શાળા પરિવાર અને વાલીઓમાં આનંદની લાગણી પ્રસરી છે.
આ ઉપરાંત શાળાની અંડર-14 કન્યાઓની ટીમ તેમજ અંડર-14 કિશોરોની ટીમે પણ તૃતીય ક્રમ મેળવી શાળાની સિદ્ધિમાં વધારો કર્યો છે. બંને ટીમોએ સ્પર્ધા દરમિયાન ખેલદિલી અને ઉત્સાહપૂર્વક પ્રદર્શન કર્યું હતું.
વિદ્યાર્થીઓની આ સિદ્ધિ બદલ ગ્રામ સેવા સમાજ-વાંકલ તથા શાળા પરિવાર દ્વારા તમામ વિજેતા રમતવીરો અને તેમને માર્ગદર્શન આપનાર કોચને અભિનંદન પાઠવવામાં આવ્યા હતા. સાથે જ જિલ્લા કક્ષાની સ્પર્ધા માટે પસંદગી પામેલી અંડર-17 કન્યાઓની ટીમને આગામી સ્પર્ધા માટે શુભેચ્છાઓ પાઠવવામાં આવી છે.
