ભરૂચ :
ભરૂચની ઐતિહાસિક જામા મસ્જિદને લઈને ચાલી રહેલા વિવાદમાં ગુજરાત હાઇકોર્ટમાં સુનાવણી યોજાઈ હતી. હાઇકોર્ટે ભરૂચ જિલ્લા કલેક્ટર, મસ્જિદ ટ્રસ્ટ, રાજ્ય સરકાર અને ભારતીય પુરાતત્વ સર્વેક્ષણ (ASI) સહિતના પક્ષકારોને નોટિસ પાઠવી વધુ સુનાવણી 2 નવેમ્બરે નિયત કરી છે. નવી બેન્ચ સમક્ષ પ્રથમ સુનાવણી દરમિયાન અદાલતે હાલ કોઈ વચગાળાનાં પગલાં લેવાનો ઇનકાર કર્યો હોવાનું જાણવા મળ્યું છે.
આ કેસમાં ભરૂચના પાંચ અરજદારોએ મસ્જિદ પરિસરમાં જૈન ધર્મના 19મા તીર્થંકર ભગવાન મલ્લિનાથની મૂર્તિ હોવાનું જણાવી તેના રક્ષણ અને જૈન સમાજને પૂજા કરવાની મંજૂરી આપવા માટે હાઇકોર્ટના નિર્દેશોની માંગ કરી છે. અરજદારોમાં સ્થાનિક રહીશો હરિશંકર જૈન અને રાહુલ દીવાન સહિતના લોકોનો સમાવેશ થાય છે. અરજદારોએ આશંકા વ્યક્ત કરી છે કે સ્મારકના મૂળ સ્વરૂપને લઈને ચાલી રહેલા વિવાદ અને તણાવ વચ્ચે મૂર્તિને નુકસાન પહોંચી શકે છે.
અરજદારોના વકીલે રજૂઆત કરી હતી કે ભગવાન મલ્લિનાથની મૂર્તિ જૈન સમાજ માટે ધાર્મિક મહત્ત્વ ધરાવે છે અને તેના રક્ષણ માટે તાત્કાલિક પગલાં લેવાં જરૂરી છે. સાથે જ જૈન સમુદાયના સભ્યોને પૂજા કરવાની મંજૂરી આપવા વિનંતી કરવામાં આવી હતી.
અરજદાર પક્ષે એવી પણ દલીલ કરી હતી કે જામા મસ્જિદ ભારતીય પુરાતત્વ સર્વેક્ષણના સંરક્ષણ હેઠળનું ઐતિહાસિક સ્મારક છે. પ્રાચીન સ્મારકો અને પુરાતત્ત્વીય સ્થળો તથા અવશેષો અધિનિયમ, 1958ની જોગવાઈઓને ધ્યાનમાં રાખીને સ્મારકના મૂળ સ્વરૂપનું જતન કરવું જરૂરી છે.
સુનાવણી દરમિયાન રાજ્ય સરકાર અને ભરૂચ કલેક્ટર તરફથી રજૂઆત કરતાં સરકારી વકીલે જણાવ્યું હતું કે સંબંધિત ઐતિહાસિક માળખાને સુરક્ષા આપવી જરૂરી છે. રજૂઆતમાં મસ્જિદના ભોંયરાના ભાગમાંથી જૈન તીર્થંકરની મૂર્તિ મળી હોવાનો મુદ્દો પણ ઉઠાવવામાં આવ્યો હતો.
ઉલ્લેખનીય છે કે જામા મસ્જિદના ભોંયરામાંથી ભગવાન મલ્લિનાથની મૂર્તિ મળી હોવાના જૈન સમાજના દાવા બાદ આ વિવાદ ચર્ચામાં આવ્યો હતો. મૂર્તિના રક્ષણ, પૂજાની મંજૂરી અને સ્મારકના ઐતિહાસિક સ્વરૂપને લગતા મુદ્દાઓ હવે હાઇકોર્ટ સમક્ષ છે.
હાલ હાઇકોર્ટે કોઈ વચગાળાનો આદેશ આપ્યો નથી અને સંબંધિત પક્ષકારોને નોટિસ પાઠવી છે. આગામી 2 નવેમ્બરની સુનાવણીમાં આ મામલે કોર્ટ શું વલણ અપનાવે છે તેના પર સૌની નજર રહેશે.
