ભરૂચ: દિવાળીના પર્વ નિમિત્તે ભરૂચ જિલ્લા જેલમાં સજા ભોગવી રહેલા ત્રણ પાકા કામના કેદીઓને 15 દિવસની પેરોલ રજા મંજૂર કરવામાં આવી છે. રાજ્ય સરકાર દ્વારા કેદીઓના કલ્યાણ અને જેલ સુધારણા પ્રવૃત્તિઓના ભાગરૂપે લેવાયેલા નિર્ણયના પગલે પાત્રતા ધરાવતા કેદીઓને પરિવારજનો સાથે દિવાળી અને નૂતન વર્ષની ઉજવણી કરવાની તક મળી છે.
રાજ્ય સરકારના નિર્ણય અનુસાર સજા ભોગવતી પાત્ર મહિલા કેદીઓ તેમજ 60 વર્ષ કે તેથી વધુ વયના પુરુષ કેદીઓને નિયમો અને નિયત શરતોને આધીન 15 દિવસની પેરોલ રજા આપવાની જોગવાઈ કરવામાં આવી છે. જેના અનુસંધાને 9 નવેમ્બરના રોજ ધનતેરસના પવિત્ર દિવસે ભરૂચ જિલ્લા જેલના ત્રણ પાકા કામના કેદીઓને જિલ્લા મેજિસ્ટ્રેટના હુકમથી પેરોલ રજા મંજૂર કરવામાં આવી હતી.
આ પ્રસંગે જિલ્લા જેલના ઈન્ચાર્જ અધિક્ષક એન.પી. રાઠોડે ત્રણેય કેદીઓને દિવાળી અને નૂતન વર્ષની શુભેચ્છાઓ પાઠવી હતી. સાથે જ પેરોલ દરમિયાન નિયત કરવામાં આવેલી તમામ શરતો અને સૂચનાઓનું ચુસ્તપણે પાલન કરવા તાકીદ કરી હતી.
લાંબા સમય બાદ પરિવારજનો સાથે રહી તહેવારની ઉજવણી કરવાની તક મળતાં ત્રણેય કેદીઓમાં આનંદની લાગણી જોવા મળી હતી. કેદીઓએ પેરોલ રજાનો લાભ આપવા બદલ રાજ્ય સરકાર અને જેલ વહીવટી તંત્રનો આભાર વ્યક્ત કર્યો હતો.
