આજે વાદળછાયા વાતાવરણ વચ્ચે મધ્ય ગુજરાતના મોટાભાગના વિસ્તારોમાં કમોસમી વરસાદ થતા ભર શિયાળે ચોમાસુ જામ્યુ હતુ. છોટાઉદેપુર જિલ્લાના લગભગ બધા વિસ્તારોમાં આજરોજ રાત દરમિયાન વરસાદની શરુઆત થઇ હતી અને હળવો વરસાદ દિવસ દરમિયાન પણ ચાલુ રહ્યો હતો. વરસાદથી વાતાવરણમાં ઠંડીનો ચમકારો જોવા મળ્યો હતો. વરસાદની અસરથી જનજીવન અસ્તવ્યસ્ત બન્યુ હતુ. જિલ્લાના મોટાભાગના બજારો સુમસામ દેખાતા હતા. કમોસમી વરસાદથી શિયાળુ ખેતીને નુકશાન થવાની ભીતિ જણાઇ રહી છે.
શિયાળુ પાકોને નુકશાન થવાની દહેશતથી ખેડૂતો ચિંતિત બન્યા છે. કમોસમી વરસાદને લઇને ગ્રામિણ વિસ્તારોમાં કાચા મકાનોમાં બનાવેલા માટીના ઓટલા ધોવાઇ ગયા હતા. વરસાદની અસર વાહનવ્યવહાર પર પણ જોવા મળી હતી. રસ્તાઓ પર વાહનોની હાજરી નહિવત જણાતી હતી. ગણ્યા ગાંઠ્યા વાહનોને લઇને રસ્તાઓ સુમસામ દેખાતા હતા. વરસાદને લઇને ચોમાસા જેવો માહોલ સર્જાતા અભરાઇ પર મુકી દીધેલા છત્રી રેઇનકોટ પાછા ઉતારવા પડ્યા હતા. કમોસમી વરસાદને લઇને છોટાઉદેપુર જિલ્લામાં જનજીવન પર તેની અસર દેખાતી હતી.
ફૈજાન ખત્રી કલારાણી જિ.છોટાઉદેપુર
