મનાઈ હુકમ હોવા છતાં જમીનમાં પાણીની લાઈનની કામગીરી કરવા સામે જમીન માલિકની કાયદેસરની કાર્યવાહી કરવાની માંગ
અંકલેશ્વરનાં માસ્તર કમ્પાઉન્ડનાં રહીશ હસમુખ ભાઈ ઘીવાલાએ તેઓની જમીનમાંથી નગરપાલિકા દ્વારા કોર્ટના મનાઈ હુકમ હોવા છતા પાણીની પાઈપ લાઈનની કામગીરી કરવામાં આવી હોવાની ફરિયાદ સાથે અંકલેશ્વર નગરપાલિકાના પ્રમુખ કારોબારી ચેરમેન સહીત એન્જીનીયર અને પોલીસ અધિકારી મળી કુલ ૧૦ સામેં કન્ટેમ્પટ ઓફ કોર્ટની અરજી અંકલેશ્વર સિવિલ કોર્ટમાં કરતા ખળભળાટ મચી જવા પામ્યો છે.
અંકલેશ્વરની હદમાં ખાતા નબર ૨૫૦ રે.સર્વે.નંબર ૫૦૧/૧ અને સર્વે નંબર ૫૦૨ ની જમીન અંકલેશ્વરના માસ્તર ફળિયામાં રહેતા હસમુખ ભાઈ ઘીવાલાની છે તેઓએ આ જમીનમાંથી નગરપાલિકા દ્વારા પાણીની પાઇપલાઇન ન નાખવા અંગે ન્યાયાલયમાંથી આદેશાત્મક મનાઈ હુકમની અને જાહેરાતનો દાવો કર્યો ચી.
જેમાં અંકલેશ્વર નગરપાલિકાના કારોબારી ચેરમેન સંદીપ પટેલ, પ્રમુખ મીના બેન પટેલ, ચીફ ઓફિસર અને અન્ય અધિકારીઓ તેમજ અંકલેશ્વર શહેર પોલીસ મથકના પી.આઈ વિરુદ્ધ કોર્ટ દ્વારા તારીખ ૧૫/૦૨/૨૦૧૬ નાં રોજ જમીનમાં કાયદેસરની કાર્યવાહી અનુશર્યા વિના કાર્યવાહી કરે નહિ તેનું કામ ચલાઉ મનાઈ હુકમ કર્યો હતો. જે દાવાના આખરી નિકાલ સુધી વચગાળાનો મનાઈ હુકમ અમલમાં હોવા છતાં પણ આ અધિકારીઓ અને પદાધિકારીઓએ તેઓની જમીનનું ખોદકામ કરી પાઇપલાઈન નાખવાની કામગીરી ચાલુ કરી તે સમયે તેઓએ અટકાવવા જતા મનાઈ હુકમ હોવાનું જણાવવા છતાં પણ બદ્વ્ય્વાહાર કરી ધમકાવી કાઢી મુકેલા.
આ લોકોની કાયદા વિરુદ્ધની કામગીરી કરવામાં આવી હોય કોર્ટમાં તેઓ વિરુદ્ધ યોગ્ય કાર્યવાહી કરવાની માંગ કરવામાં આવી છે અને તેઓ વિરુદ્ધ કન્ટેમ્પટ ઓફ કોર્ટ હેઠળ કાર્યવાહી કરવામાં આવે તેવી માંગણી કરવામાં આવી છે.
કન્ટેમ્પટ ઓફ કોર્ટની અરજીના પગલે અંકલેશ્વરના રાજકીય ક્ષેત્રે અને નગરપાલિકામાં ખળભળાટ મચી જવા પામ્યો છે.
