ઇમરાન મોદી- પાલેજ
નેશનલ હાઇવે નંબર ૪૮ પર આવેલા ભરૂચ તાલુકાના ઝંઘાર ગામના પાટિયા પાસે એક કન્ટેનર ટ્રક પાછળ ઘૂસી જતાં કન્ટેનર ચાલકનું સારવાર દરમિયાન કરૂણ મોત નીપજવા પામ્યું હતું. પોલીસ સુત્રીય માહિતી અનુસાર ગત રાત્રીના નવેક વાગ્યાના સુમારે ને. હાઇવે નંબર ૪૮ પર આવેલા ભરૂચ તાલુકાના ઝંઘાર ગામના પાટિયા પાસે ટ્રક નંબર જીજે – ૧૬ – એક્સ ૯૬૮૫ જે રેતી ભરીને નારેશ્વર થી સુરત તરફ જઈ રહી હતી અને સુરત રેતી ખાલી કરી પરત આવી રહી હતી ત્યારે રાતના નવેક વાગ્યાના સુમારે ઝંઘાર ગામના પાટિયા પાસે યુ ટર્ન લેતી વેળા પાછળથી એક કન્ટેનર નંબર એચ આર – ૫૫ – એલ – ૮૮૭૭ ના ચાલકે ગફલતભરી રીતે પુરઝડપે હંકારતા કન્ટેનર ટ્રક પાછળ ધડાકાભેર અથડાતાં કન્ટેનર ચાલક કેબિનમાં ફસાઈ ગયો હતો.
અકસ્માતની જાણ થતાં લોકોએ ભેગા થઇ કન્ટેનરમાં ફસાઇ ગયેલા ચાલકને કેબિનમાંથી ક્રેઇનની મદદ વડે બહાર કાઢતાં ચાલકને બંને પગે ગંભીર ઇજાઓ થઇ હતી. ઇજાગ્રસ્ત ચાલકને તાત્કાલિક ૧૦૮ દ્વારા ભરૂચ સિવિલ હોસ્પિટલમાં સારવાર અર્થે ખસેડાયો હતો જ્યાં સારવાર દરમિયાન ચાલકનું મોત નીપજવા પામ્યું હતું. જેની ઓળખ અમરજીત સિંહ રસમ સિંહ પિંડ રહે. થ્રંકલાલ ગુરદાસપુર પંજાબનો હોવાની માહિતી મળી છે. અકસ્માત સંદર્ભે યોગેશભાઇ ધીરજભાઇ પરમારે નબીપુર પોલીસ મથકમાં ફરિયાદ નોંધાવતા પોલીસે વધુ તપાસ હાથ ધરી છે.
