દહેજ :: ગુજરાત ઇન્ડસ્ટ્રીયલ ડેવલપમેન્ટ કોર્પોરેશન (GIDC) ના વાઇસ ચેરપર્સન અને મેનેજિંગ ડિરેક્ટર પ્રવીણા ડી.કે. એ આજે વરિષ્ઠ અધિકારીઓ સાથે દહેજ ઇન્ડસ્ટ્રિયલ એસ્ટેટની મુલાકાત લઈ દહેજ PCPIR પ્રદેશમાં ચાલી રહેલા વિકાસ કાર્યોની સમીક્ષા કરી હતી. સાથે જ ભવિષ્યની માળખાગત જરૂરિયાતો અને ઔદ્યોગિક વિકાસને વધુ ગતિ આપવા અંગે વિસ્તૃત ચર્ચા કરવામાં આવી હતી.
દહેજ ઇન્ડસ્ટ્રીઝ એસોસિએશન (DIA) ના પ્રતિનિધિઓની ઉપસ્થિતિમાં ડિસેલિનેશન પ્લાન્ટ ખાતે આવેલા કોન્ફરન્સ હોલમાં બેઠક અને પ્રેઝન્ટેશન સત્ર યોજાયું હતું. જેમાં DIA પ્રમુખ ડૉ. સુનિલ ભટ્ટ, જનરલ સેક્રેટરી બલદેવ આહિર, ઉપપ્રમુખ મહેન્દ્રસિંહ રાણા તથા મેનેજિંગ કમિટી સભ્ય અનિલ ચૌમલ હાજર રહ્યા હતા.
ડૉ. સુનિલ ભટ્ટે દહેજ એસ્ટેટના ઝડપી ઔદ્યોગિક વિકાસ અને ટકાઉ વિસ્તરણ માટે જરૂરી ભવિષ્યલક્ષી પ્રોજેક્ટ્સ અંગે વિગતવાર રજૂઆત કરી હતી. તેમણે દહેજને વિશ્વ કક્ષાની સ્માર્ટ ઇન્ડસ્ટ્રિયલ હબ તરીકે વિકસાવવા માટે વિવિધ માળખાગત સુવિધાઓની આવશ્યકતા પર ભાર મૂક્યો હતો.
બેઠક દરમિયાન ટ્રાન્સપોર્ટ નગર વિકાસ, કોમન એફ્લુઅન્ટ ટ્રીટમેન્ટ પ્લાન્ટ (CETP) ના અપગ્રેડેશન, ફેઝ-2 અને ફેઝ-3 માં નવા ફાયર સ્ટેશન, એડવાન્સ્ડ કમાન્ડ એન્ડ કંટ્રોલ સેન્ટર, મલ્ટી-સ્પેશિયાલિટી હોસ્પિટલ અને નર્સિંગ કોલેજ, RCC રોડ નેટવર્કનું વિસ્તરણ, હેલિપોર્ટ ઇન્ફ્રાસ્ટ્રક્ચર, એડેપ્ટિવ ટ્રાફિક કંટ્રોલ સિસ્ટમ (ATCS) તેમજ પાઇપ કન્વેયર બેલ્ટ સિસ્ટમ અને MSW મેનેજમેન્ટ સાઇટ જેવા મહત્વપૂર્ણ મુદ્દાઓ પર ચર્ચા કરવામાં આવી હતી.
GIDC VCMD પ્રવીણા ડી.કે. તેમજ વરિષ્ઠ અધિકારીઓએ DIA દ્વારા કરવામાં આવતા સક્રિય પ્રયાસોની પ્રશંસા કરી હતી અને દહેજને આધુનિક, સ્માર્ટ તથા ટકાઉ ઔદ્યોગિક વસાહત તરીકે વિકસાવવા માટે સંપૂર્ણ સહયોગ અને સમર્થનની ખાતરી આપી હતી.
દહેજ PCPIR ક્ષેત્રના સર્વાંગી વિકાસ માટે GIDC નેતૃત્વ અને ગુજરાત સરકાર દ્વારા અપાતી સતત મદદ અને પ્રતિબદ્ધતા બદલ DIA દ્વારા આભાર વ્યક્ત કરવામાં આવ્યો હતો.
