ભરૂચ :
દર વર્ષે 15 જૂનના રોજ સમગ્ર વિશ્વમાં વિશ્વ વૃદ્ધ દુર્વ્યવહાર જાગૃતિ દિવસ (World Elder Abuse Awareness Day) ઉજવવામાં આવે છે. આ દિવસનો મુખ્ય હેતુ વૃદ્ધો સામે થતા દુર્વ્યવહાર, શોષણ અને અન્યાય અંગે સમાજમાં જાગૃતિ લાવવાનો છે. આ અનુસંધાને જિલ્લા કાનૂની સેવા સત્તામંડળ (DLSA), ભરૂચ દ્વારા સોમવારે સવારે 9:30 કલાકે કસક વડીલોના ઘર ખાતે જાગૃતિ કાર્યક્રમનું આયોજન કરવામાં આવ્યું છે.
કાર્યક્રમ દરમિયાન વૃદ્ધો સામે થતા વિવિધ પ્રકારના દુર્વ્યવહાર અંગે લોકોને માહિતગાર કરવામાં આવશે. વૃદ્ધોને શારીરિક, માનસિક, આર્થિક અથવા ભાવનાત્મક રીતે નુકસાન પહોંચાડવું અથવા તેમની અવગણના કરવી તે વૃદ્ધ દુર્વ્યવહાર ગણાય છે. તેમાં શારીરિક હિંસા, માનસિક ત્રાસ, આર્થિક શોષણ તેમજ યોગ્ય ભોજન, દવા કે સારવાર ન આપવી જેવી અવગણનાનો સમાવેશ થાય છે.
વિશેષજ્ઞો દ્વારા વૃદ્ધ દુર્વ્યવહારના મુખ્ય કારણો જેમ કે સંયુક્ત કુટુંબ પ્રથાનો અંત, બદલાતી જીવનશૈલી, વ્યસ્ત દિનચર્યા, આર્થિક સમસ્યાઓ અને ટેક્નોલોજીના કારણે પેઢીઓ વચ્ચે વધતા અંતર અંગે માર્ગદર્શન આપવામાં આવશે.
કાર્યક્રમમાં વૃદ્ધોના કાયદાકીય અધિકારો વિશે પણ માહિતી આપવામાં આવશે. ભારતમાં મેઇન્ટેઇન એન્ડ વેલફેર ઓફ પેરેન્ટ્સ એન્ડ સિનિયર સિટીઝન એક્ટ 2007 અમલમાં છે, જેના અંતર્ગત માતા-પિતાની સંભાળ રાખવી સંતાનોની કાનૂની ફરજ છે. વડીલોને ભરણપોષણ મેળવવાનો તેમજ પોતાની મિલકતના રક્ષણનો સંપૂર્ણ અધિકાર પ્રાપ્ત છે. DLSA ભરૂચ દ્વારા વૃદ્ધોને મફત કાનૂની સહાય અને માર્ગદર્શન પણ ઉપલબ્ધ કરાવવામાં આવે છે.
આ પ્રસંગે સૌને સંદેશ આપવામાં આવશે કે વડીલો આપણા અનુભવનો અમૂલ્ય ભંડાર છે અને તેમના પ્રત્યે પ્રેમ, સન્માન અને કાળજી રાખવી એ આપણી નૈતિક ફરજ છે.
કાર્યક્રમ અંતે સંકલ્પ લેવાશે કે વડીલોનો આદર કરી તેમના અધિકારોનું રક્ષણ કરવામાં આવશે તથા દરેક વૃદ્ધને ગૌરવપૂર્ણ જીવન જીવવામાં મદદરૂપ બનવામાં આવશે.
