સુરત ગ્રામ્ય જિલ્લામાં ફાર્મહાઉસો અને અન્ય સ્થળોએ ચાલતી ગેરકાયદેસર પ્રવૃત્તિઓ સામે પોલીસ દ્વારા કાર્યવાહી તેજ કરવામાં આવી છે. આ અભિયાનના ભાગરૂપે સુરત ગ્રામ્ય લોકલ ક્રાઈમ બ્રાન્ચ (LCB)એ કામરેજ તાલુકાના હલધરૂ ગામની હદમાં આવેલા એપલપલુ વિલા ફાર્મહાઉસ નં.36માં ચાલતી વિદેશી દારૂની મહેફિલ પર દરોડો પાડી 9 શખ્સોને ઝડપી પાડ્યા હતા. દરોડાની કાર્યવાહી દરમિયાન વિદેશી દારૂ, મોબાઈલ ફોન, રોકડ રકમ અને ચાર ફોરવ્હીલ વાહનો સહિત કુલ ₹27,13,506નો મુદ્દામાલ કબજે કરવામાં આવ્યો હતો.
સુરત વિભાગના પોલીસ મહાનિરીક્ષક પ્રેમવીર સિંહની રાહબરી હેઠળ અને સુરત ગ્રામ્ય પોલીસ અધિક્ષક રાજેશ ગઢિયાના માર્ગદર્શન હેઠળ જિલ્લામાં અસામાજિક તત્વો તથા ગેરકાયદેસર પ્રવૃત્તિઓ પર નજર રાખવા સૂચના આપવામાં આવી હતી. જેના અનુસંધાને LCB PI એન.જી. પાંચાણીએ વિવિધ ટીમો બનાવી રાત્રિના સમયે ફાર્મહાઉસ, હોટલ અને ગેસ્ટહાઉસ સહિતના સ્થળોએ ચેકિંગ હાથ ધર્યું હતું. દરમિયાન કામરેજના હલધરૂ ગામમાં આવેલી એપલપલુ વિલા ફાર્મહાઉસમાં વિદેશી દારૂની મહેફિલ ચાલતી હોવાની ચોક્કસ બાતમી મળતાં ટીમે દરોડો પાડ્યો હતો.
મહેફિલમાં 9 શખ્સો ઝડપાયા
પોલીસના દરોડા દરમિયાન ફાર્મહાઉસમાં દારૂની મહેફિલ માણતા 9 શખ્સોને ઝડપી લેવામાં આવ્યા હતા. ઝડપાયેલા આરોપીઓમાં રાહુલભાઈ સંતોષભાઈ રાઠોડ, અમરશીભાઈ ભાંગાભાઈ વસાવા, નીવ મનસુખભાઈ ડોબરીયા, મયુર પ્રકાશભાઈ રાઠોડ, અરવિંદ ઈશ્વરભાઈ રાઠોડ, અજય શંકરભાઈ રાઠોડ, ફ્રીડમ કમલેશભાઈ ચૌહાણ, દેવ દીપકભાઈ પટેલ અને અમિત ઈશ્વરભાઈ વાસફોડીયાનો સમાવેશ થાય છે.
પોલીસે આરોપીઓની સઘન પૂછપરછ કરતાં મહેફિલના આયોજન અંગે મહત્વની વિગતો સામે આવી હતી. પ્રેસનોટ મુજબ અંત્રોલી ભુરી ફળિયાના રોહિત વાસફોડીયા તથા ઈશ્વર વાસફોડીયા દ્વારા ફાર્મહાઉસમાં મહેફિલનું આયોજન કરવામાં આવ્યું હતું. દારૂ તથા ખાવા-પીવાની વ્યવસ્થા કરી અન્ય શખ્સોને મહેફિલ માટે બોલાવવામાં આવ્યા હોવાનું તપાસમાં જાણવા મળ્યું હતું.
10 આરોપીઓ પોલીસ ચોપડે વોન્ટેડ
મહેફિલના આયોજનમાં સંડોવણી અને હાજર ન હોવાને કારણે પોલીસ દ્વારા 10 શખ્સોને વોન્ટેડ જાહેર કરવામાં આવ્યા છે. જેમાં ઈશ્વર રમેશભાઈ વાંસફોડા, રોહીત ઉર્ફે બુચો કદિશે ભાઈ વાંસફોડા, પ્રકાશ રમેશભાઈ વાંસફોડા, મીતલો, કેતુલ વાંસફોડા, દુર્લભ લુહાર, સલમાન શેખ, ભુમીત, ધવલ રાઠોડ અને આયુષ રાઠોડનો સમાવેશ થાય છે.
આમ, પોલીસની કાર્યવાહીનો વ્યાપ જોતા 9 આરોપીઓ ઝડપાયા છે જ્યારે 10 આરોપીઓ વોન્ટેડ છે, એટલે પ્રેસનોટ મુજબ કુલ 19 આરોપીઓ સામે કાર્યવાહી કરવામાં આવી છે.
ચાર કાર સહિત લાખોનો મુદ્દામાલ જપ્ત
દરોડા દરમિયાન પોલીસે આરોપીઓ પાસેથી 500 એમએલની 12 બીયરની બોટલ, જ્હોની વોકર બ્લેક લેબલ સ્કોચ વ્હિસ્કીની અડધી ભરેલી બોટલ, પ્લાસ્ટિકની બોટલમાં ભરેલો વિદેશી દારૂ તેમજ ખાલી દારૂ-બીયરની 61 બોટલો કબજે કરી હતી. આ ઉપરાંત ફાર્મહાઉસમાં ઉપયોગમાં લેવાતા સોફા, ટીપાઈ, ટેબલ, ખાટલા અને ખુરશીઓ પણ કબજે કરવામાં આવી હતી.
પોલીસે આરોપીઓ પાસેથી 11 મોબાઈલ ફોન, ₹1,600 રોકડા તેમજ ચાર ફોરવ્હીલ કાર કબજે કરી હતી. કબજે કરાયેલા વાહનોમાં સ્કોર્પિયો, હ્યુન્ડાઈ કાર, મારુતિ સુઝુકી સ્વિફ્ટ અને મારુતિ સુઝુકી ફ્રોન્ક્સનો સમાવેશ થાય છે. સમગ્ર મુદ્દામાલની કુલ કિંમત ₹27,13,506 હોવાનું પ્રેસનોટમાં દર્શાવવામાં આવ્યું છે.
ફાર્મહાઉસોમાં થતી ગેરકાયદેસર પ્રવૃત્તિઓ પર નજર
સુરત ગ્રામ્ય LCB દ્વારા કરવામાં આવેલી આ કાર્યવાહીથી ફાર્મહાઉસ, હોટલ અને ગેસ્ટહાઉસ જેવા સ્થળોએ ગેરકાયદેસર રીતે ચાલતી પ્રવૃત્તિઓ સામે પોલીસની નજર વધુ કડક બની હોવાનું સ્પષ્ટ થાય છે. ખાસ કરીને રાત્રિના સમયે આવા સ્થળોએ થતી અસામાજિક પ્રવૃત્તિઓ શોધી કાઢવા માટે LCBની ટીમો દ્વારા ચેકિંગ હાથ ધરવામાં આવી રહ્યું છે.
પોલીસે ઝડપાયેલા આરોપીઓ સામે કાયદેસરની કાર્યવાહી હાથ ધરી છે, જ્યારે વોન્ટેડ જાહેર કરાયેલા 10 આરોપીઓને ઝડપી પાડવા માટે વધુ તપાસ અને શોધખોળ હાથ ધરવામાં આવી છે. આ સમગ્ર કાર્યવાહી LCB PI એન.જી. પાંચાણી, PSI જે.એલ. પટેલ, PSI એચ.સી. મસાણી, PSI એ.એન. ચૌહાણ, PSI જે.કે. રાવ સહિતના અધિકારીઓ અને કર્મચારીઓની ટીમે કરી હતી.
