ભરૂચ :
ભરૂચ શહેરને સ્વચ્છ અને સુંદર બનાવવાના હેતુથી રોટરી ક્લબ ઓફ ભરૂચ ફેમિના દ્વારા ‘Civic Sense Drive’ અંતર્ગત સ્વચ્છતા જાગૃતિ અભિયાન યોજાયું હતું. અભિયાન દરમિયાન ભરૂચ નગરપાલિકાની આશરે 180 સફાઈ કામદાર બહેનોને સાડીનું વિતરણ કરી સન્માનિત કરવામાં આવી હતી.
કાર્યક્રમમાં સફાઈ કામદાર બહેનોને જાહેર સ્થળોની સ્વચ્છતા, કચરાના યોગ્ય વ્યવસ્થાપન અને સ્વચ્છતા જાળવવામાં નાગરિકોની જવાબદારી અંગે જાગૃત કરવામાં આવ્યા હતા. રોટરી ક્લબ દ્વારા ‘સ્વચ્છતા માત્ર સફાઈ કામદારોની જવાબદારી નથી, પરંતુ દરેક નાગરિકની ફરજ છે’ તેવો સંદેશ આપવામાં આવ્યો હતો.
આ પ્રસંગે રોટરી ક્લબ ઓફ ભરૂચ ફેમિનાના પ્રમુખ વંદના શેટ્ટી, સેક્રેટરી સંગીતા ઝા, સિવિક સેન્સ ડ્રાઇવના ચેરમેન સુરભી તમાકુવાલા સહિત ટીમના સભ્યો ઉપસ્થિત રહ્યા હતા. ઉપરાંત ભરૂચ નગરપાલિકાના પ્રમુખ દેવેન્દ્રસિંહ વસાવા, ઉપપ્રમુખ રચિતા મોદી, ચીફ ઓફિસર હરીશ અગ્રવાલ, વિવિધ સમિતિના ચેરમેન, સેનેટરી વિભાગના અધિકારીઓ તેમજ મોટી સંખ્યામાં સફાઈ કામદાર બહેનો હાજર રહ્યા હતા.
રોટરી ક્લબ દ્વારા નાગરિકોને જાહેર સ્થળોએ કચરો નહીં ફેંકવા, કચરો યોગ્ય જગ્યાએ જ નાખવા અને શહેરની સ્વચ્છતા જાળવવામાં સહભાગી બનવા અપીલ કરવામાં આવી હતી. કાર્યક્રમનું સમાપન **‘સ્વચ્છ ભરૂચ–સુંદર ભરૂચ’**ના સંદેશ સાથે કરવામાં આવ્યું હતું.
