ભરૂચ ।
ભરૂચ નગરપાલિકા દ્વારા સ્વર્ણિમ જયંતી મુખ્યમંત્રી શહેરી વિકાસ યોજના અંતર્ગત જ્યોતિનગર પાણીની ટાંકી પાસે રૂ.4.88 કરોડના ખર્ચે નવનિર્મિત જિલ્લા કક્ષાના અદ્યતન ‘મોડલ ફાયર સ્ટેશન’નું લોકાર્પણ કરવામાં આવ્યું હતું. ધારાસભ્ય રમેશ મિસ્ત્રી, ભાજપ જિલ્લા પ્રમુખ પ્રકાશ મોદી, નગરપાલિકા પ્રમુખ દેવેન્દ્રસિંહ વસાવા, ચીફ ઓફિસર હરીશ અગ્રવાલ અને ફાયર અધિકારી ચિરાગ ગઢવી સહિતના સદસ્યો તથા ફાયર બ્રિગેડની ટીમની ઉપસ્થિતિમાં લોકાર્પણ કાર્યક્રમ યોજાયો હતો.
વિશાળ જગ્યામાં તૈયાર કરાયેલા આ મોડલ ફાયર સ્ટેશનમાં એકસાથે સાત જેટલા મોટા ફાયર ટેન્ડર તેમજ અન્ય ફાયર વાહનોના પાર્કિંગની સુવિધા ઉભી કરવામાં આવી છે. ઉપરાંત ફાયર બ્રિગેડના કર્મચારીઓને તાત્કાલિક ઉપલબ્ધ કરાવવા માટે પરિસરમાં જ 21 જેટલા આવાસોનું નિર્માણ કરવામાં આવ્યું છે. આ સુવિધાઓના કારણે આગ અને અન્ય આપત્તિના સમયે ફાયર વિભાગની કામગીરી વધુ સુવ્યવસ્થિત બનશે.
લોકાર્પણ પ્રસંગે ધારાસભ્ય રમેશ મિસ્ત્રીએ જણાવ્યું હતું કે, ભરૂચ નગરપાલિકાની ફાયર ટીમ શહેર ઉપરાંત સમગ્ર જિલ્લામાં આગ સહિતની વિવિધ આપત્તિઓ દરમિયાન અસરકારક કામગીરી કરી રહી છે. રાજ્ય સરકાર દ્વારા ફાયર વિભાગને અત્યાધુનિક સાધનો, ક્રેન સહિતની સુવિધાઓ તેમજ કર્મચારીઓને જરૂરી તાલીમ આપવામાં આવી રહી છે.
નવા ફાયર સ્ટેશનના કારણે ભરૂચ શહેર ઉપરાંત ઝાડેશ્વર, ભોલાવ અને તવરા સહિતના આસપાસના વિસ્તારોમાં આગની દુર્ઘટના સમયે ઝડપી બચાવ અને રાહત કામગીરી હાથ ધરી શકાશે. ખાસ કરીને હાઈરાઈઝ ઇમારતો અને ઔદ્યોગિક વિસ્તારોમાં આગની ઘટનાઓ દરમિયાન આ સ્ટેશન મહત્વપૂર્ણ સાબિત થશે.
કાર્યક્રમ દરમિયાન નગરપાલિકા પ્રમુખ, ચીફ ઓફિસર, ચૂંટાયેલા સભ્યો તથા ફાયર બ્રિગેડના અધિકારીઓ અને જવાનોની કામગીરીને બિરદાવવામાં આવી હતી. જીવના જોખમે ફરજ બજાવતા અગ્નિશામક દળના જવાનોને તેમની સેવાઓ બદલ અભિનંદન પાઠવવામાં આવ્યા હતા. નવા મોડલ ફાયર સ્ટેશનથી ભરૂચ અને આસપાસના વિસ્તારોમાં અગ્નિશામક સેવાઓ વધુ મજબૂત બનવાની અપેક્ષા વ્યક્ત કરવામાં આવી હતી.
