ભરૂચ.
ભરૂચ જિલ્લાના એક ગામમાં રહેતી યુવતિને સોશિયલ મિડીયા પર ભરૂચના રજની મિસ્ત્રી નામના યુવાન સાથે મૈત્રી થઇ હતી. રજની મિસ્ત્રી ભરૂચના એક સ્મશાન ઘાટ પર મડદા બાળવાનું કામ કરતો હતો. મોબાઇલમાં ચેટ કરતાં કરતાં બન્ને વચ્ચે પ્રણય પ્રાંગર્યો હતો. બાદમાં તેઓ એક બીજાને મળતાં થયાં હતાં. રજની મિસ્ત્રી પરીણિત હોવાનું જાણવા છતાં બન્ને વચ્ચેનો પ્રેમ એટલો વધી ગયો હતો કે તેમણે તમામ હદ વટાવી લીધી હતી. તેઓ તેમના અંગત પળો માણતાં હોય ત્યારે રજનીએ તેમના વિડીયો પણ બનાવી લીધાં હતાં. અરસામાં કોઇ કારણસર તેમની વચ્ચે મનભેદ થતાં પ્રેમી યુગલ છુટું પડી ગયું હતું. યુવતિએ થોડા સમય બાદ અન્ય એક યુવાન સાથે પ્રેમ સંબંધ થઇ જતાં તે તેની સાથે લીવ-ઇન રિલેશન શીપમાં રહેવા લાગી હતી. દરમિયાનમાં રજનીને તેની જાણ થતાં તે યુવતી સાથે રહેતાં યુવાનને મળ્યો હતો. તેણે તેને ધાકધમકીઓ આપી હતી. તેણે તેને જણાવ્યું હતું કે, આ યુવતિ સાથે મારે પ્રેમ સંબંધ છે, તે મારી છે. તું અમારી વચ્ચે ના આવ. ઉપરાંત રજનીએ યુવતી સાથેના તેમના અંગતપળોના વિડીયો પણ તેને બતાવ્યાં હતાં. જે અંગે યુવતિને જાણ થતાં તેણે રજનીને તેનું જીવન ન બગાડવા માટે આજીજી કરી હતી જોકે, તે માન્યો ન હતો. જેથી આખરે યુવતિએ ભરૂચ બી ડિવિઝન પોલીસ મથકે ફરિયાદ નોંધાવી હતી. મામલામાં પોલીસે ગુનો નોંધી આરોપીને ઝડપી પાડવાના ચક્રોગતિમાન કર્યાં છે.
