પાનોલી રેલવે સ્ટેશને મળસ્કે બનેલી ઘટના
ભરૂચ.
મુંબઇના થાણે ખાતે રહેતી સોનમ રામકરણ યાદવ તેમના પતિ તેમજ પુત્રી સાથે અમદાવાદ ખાતે કામ અર્થે ગયાં હતાં. જ્યાંથી મુંબઇ પરત જવા માટે તેઓ અમદાવાદ રેલવે સ્ટેશનેથી અમદાવાદ બોરીવલી એક્સપ્રેસ ટ્રેનમાં રિઝર્વેશન કરાવી તેઓ પરત થાણે જવા માટે નિકળ્યાં હતાં. સોનમ યાદવે તેમના લેડિઝ પર્સમાં તેમનો મોબાઇલ, સોના-ચાંદીના દાગીના તેમજ રોકડા રૂપિયા મળી કુલ 1.48 લાખનો સામાન ભર્યો હતો. તે પર઼સ પોતાના હાથમાં મુકીને બેઠાં હતાં. તે વેળાં ટ્રેન પાનોલી રેલવે સ્ટેશને આવતાં ઉભી રહી હતી. દરમિયાનમાં ટ્રેન ધીમેધીમે ચાલવા લાગતાં એક ગઠિયાએ તેમના હાથમાંથી તેમનું પર્સ આંચકીને ટ્રેનમાંથી નીચે ઉતરી ગયો હતો. તેઓએ પીછો કરવાનો પ્રયાસ કર્યો હતો. જોકે, ટ્રેન ફાસ્ટ થઇ જતાં તેઓ નીચે ઉતરી શક્યાં ન હતાં. બનાવને પગલે તેમણે ભરૂચ રેલવે પોલીસ મથકે ફરિયાદ નોંધાવતાં પોલીસે ગુનો નોંધી આગળની કાર્યવાહી હાથ ધરી છે.
