રાજ્યભરમાં સાયબર ક્રાઇમ ડિટેક્શન ક્ષેત્રે ગત મહિને ઉત્કૃષ્ટ કામગીરી કરનાર તરીકે ભરૂચના સાયબર ક્રાઇમ પોલીસ સ્ટેશનને વિશેષ ઓળખ મળી છે. સમગ્ર રાજ્યમાંથી માત્ર ભરૂચના સાયબર ક્રાઇમ પોલીસ સ્ટેશનના ત્રણ પોલીસકર્મીઓની પસંદગી થઈ, જેમને ‘સાયબર કોપ એવોર્ડ’ના સ્મૃતિચિન્હ અને પ્રમાણપત્રથી સન્માનિત કરવામાં આવ્યા હતા.
ભરૂચ સાયબર ક્રાઇમ પોલીસ સ્ટેશનમાં ફરજ બજાવતા કોન્સ્ટેબલ મલ્કેશ ગોહિલ, રમેશભાઈ પરમાર અને સાહીલ રાજે સાયબર ગુનાખોરીના જામતારા કનેક્શનને શોધી કાઢીને આરોપીની ધરપકડ કરવામાં નોંધપાત્ર સફળતા મેળવી હતી. તેમની આ અસરકારક અને પ્રશંસનીય કામગીરીને ધ્યાનમાં લઈ તેમને ગુજરાત રાજ્યના પોલીસ મહાનિર્દેશક અને મુખ્ય પોલીસ અધિકારી, ગાંધીનગરના હસ્તે એવોર્ડ એનાયત કરવામાં આવ્યો હતો.
આ સન્માન ભરૂચ પોલીસની કાર્યક્ષમતા અને સાયબર ગુનાઓ સામેની મજબૂત કામગીરીને ઉજાગર કરે છે.
