જંબુસર : કાવી ગામે પ્રેમ સંબંધમાં ઝેરનાં પારખાં કરતાં પરણિત પ્રેમીનું થયેલું મોત.

જંબુસર તાલુકાનાં કાવી ગામનાં બાગ ફળિયામાં રહેતાં 28 વર્ષીય પરણેતર પ્રેમીએ પ્રેમ સંબંધમાં ઝેરનાં પારખાં કરતાં મોતને શરણે થવાનાં સમાચાર પ્રાપ્ત થયાં છે. પ્રાપ્ત વિગત અનુસાર કાવી ગામે બાગ ફળિયામાં રહેતાં 28 વર્ષીય રાઠોડ નરેશભાઇ બાબુ ભાઈને ગામની જ હંસાબેન નામની એક છોકરી સાથે પ્રેમ સંબંધ હતો અને બંનેને પ્રભુતામાં પગલાં માંડવા હતા પરંતુ બંને પ્રેમી પાત્રો અલગ-અલગ સમાજનાં હોય જેથી સમાજનાં ડરના કારણે બંને પ્રેમી પાત્રો પોતાની જીવન લીલા સંકેલી લેવા રાત્રીના સમયે તળાવની પાળની પાછળ આવેલ કપાસનાં ખેતરમાં બંને જણે ઝેરી દવા ગટગટાવી જતાં રાઠોડ નરેશભાઇ બાબુભાઇ (ઉં.28) કાવી નાઓનું પ્રાણ પંખેરુ ઊડી ગયું હતું. જયારે તેની પ્રેમિકા દવા પીને ત્યાંથી વસતી વિસ્તારમાં જતી રહેતાં લોકોએ તેને દવાખાને લઈ જતાં તેનો અદભુત બચાવ થયો હતો. જોકે મરણ થનાર રાઠોડ નરેશભાઈએ લગ્ન કરેલ હોય અને ત્રણ બાળકો પણ છે. જયારે બચી ગયેલ પ્રિયતમા કુંવારી છે. અત્રે ઉલ્લેખનીય બાબત છે કે લોકો કહે છે કે પ્રેમ આંધળો છે પરંતુ પ્રેમ આંધળો નથી પ્રેમ કરનારા આંધળા છે. જોકે પ્રિયતમા દવાખાનામાં સારવાર હેઠળ છે. તેની તબિયત સુધારા પર છે. ઉપરોકત બાબત અંગે મરણ થનારનાં પિતા શ્રી રાઠોડ બાબુભાઇ પુજાભાઈ રહે.કાવી નાઓએ કાવી પોલીસને જાણ કરતાં કાવી પોલીસે ગુનો નોંધી આગળની તપાસ હાથ ધરી છે.