માંગરોળ તાલુકાના વાંકલ ગામે મુખ્ય માર્ગ પર બેફામ દોડતા હાઈવા ટ્રક ડમ્પરે કન્યા છાત્રાલયની કંમ્પાઉન્ડ વોલ તોડી નાખી હતી પરંતુ આ ઘટનામાં સદ નસીબે મોટી જાનહાની ટળી હતી.
વાંકલ ગામે મુખ્ય માર્ગ પર કાર્યરત ગ્રામસેવા સમાજ ટ્રસ્ટ સંચાલિત કસ્તુરબા કન્યા છાત્રાલય ખાતે આ ઘટના બની છે. વાંકલ ઝંખવાવ મુખ્ય માર્ગ પર બેફામ દોડતા હાઈવા ટ્રક ડમરો અંગે વારંવાર ફરિયાદો ઉઠવા પામી છે. પરંતુ યોગ્ય પ્રકારની કાર્યવાહી નહીં થતા અકસ્માતના બનાવો બની રહ્યા છે. બપોરના સમયે ટ્રક ચાલકે પોતાનું વાહન બેફામ હંકારી માર્ગ પરનું ડિવાઇડર તોડી નાખ્યું હતું અને ત્યારબાદ આ ટ્રક કન્યા છાત્રાલયની કંમ્પાઉન્ડ વોલ સાથે અથડાતા કંપાઉન્ડવોલ તૂટી ગઈ હતી આ અકસ્માતમાં સદનસીબે મોટી જાનહાની ટળી હતી. કન્યા છાત્રાલયમાં રહેતી વિદ્યાર્થીનીઓ અભ્યાસ વર્ગમાં હોવાથી બચાવ થયો હતો તેમજ ટ્રકના ચાલકનો પણ આબાદ બચાવ થયો છે. અકસ્માત સર્જી ટ્રકનો ચાલક ટ્રક મૂકી ફરાર થઈ ગયો હતો. વાહન અને કંમ્પાઉન્ડ વોલ બંનેને નુકસાન થયું છે. આ ઘટનાની જાણ વાંકલ ગ્રામ સેવા સમાજ ટ્રસ્ટના પ્રમુખ સુભાષભાઈ ચૌધરી દ્વારા પોલીસને કરવામાં આવતા પોલીસ પણ ઘટના સ્થળે પહોંચી હતી.
વિનોદ મૈસુરિયા : વાંકલ
