વાગરા :
વાગરા તાલુકાના અલાદર ગામે મહાવીર મિનરલ્સ કંપનીની લેબર કોલોનીમાં કરંટ લાગતાં 29 વર્ષીય શ્રમિકનું મોત નીપજ્યું હતું. બનાવ અંગે વાગરા પોલીસે અકસ્માતે મોતનો ગુનો નોંધી તપાસ હાથ ધરી છે.
મળતી માહિતી મુજબ, બિહારના કૈમુર જિલ્લાના રામગઢ તાલુકાના ગોરાસરા ગામનો વતની મુલાયમ ઓમપ્રકાશ ચૌધરી (ઉં.વ.29) હાલ અલાદર ગામે આવેલી મહાવીર મિનરલ્સ કંપનીની લેબર કોલોનીમાં રહેતો હતો અને મજૂરી કામ કરતો હતો.
ગત તા.24 સપ્ટેમ્બરના રોજ રાત્રિના આશરે 8:30 વાગ્યાના અરસામાં મુલાયમ પોતાના રૂમમાં જમવાનું બનાવી રહ્યો હતો. દરમિયાન શાકભાજીની થેલી રૂમની છતના ભાગે આવેલી લોખંડની એંગલ સાથેના હુકમાં લટકાવવા જતાં તેનો હાથ લોખંડની એંગલ સાથેના સળિયા સાથે અડી ગયો હતો.
લોખંડના ભાગમાં વીજ કરંટ પ્રસરી રહ્યો હોવાથી મુલાયમને અચાનક જોરદાર ઇલેક્ટ્રિક શોક લાગ્યો હતો. બનાવ બનતાં આસપાસના લોકો દોડી આવ્યા હતા. તાત્કાલિક 108 એમ્બ્યુલન્સ મારફતે તેને વાગરા સરકારી દવાખાને સારવાર માટે ખસેડવામાં આવ્યો હતો.
જોકે, ફરજ પરના તબીબે તપાસ કરતાં રાત્રે 9:55 વાગ્યે મુલાયમ ચૌધરીને મૃત જાહેર કર્યો હતો. બનાવની જાણ થતાં વાગરા પોલીસે સ્થળ પર પહોંચી કાર્યવાહી હાથ ધરી હતી. પોલીસે BNSS કલમ 194 મુજબ અકસ્માતે મોતનો ગુનો નોંધી સમગ્ર ઘટનાની તપાસ શરૂ કરી છે. વીજ કરંટ કયા કારણોસર લોખંડની એંગલ સુધી પહોંચ્યો હતો તે અંગે પણ તપાસ હાથ ધરવામાં આવી છે.
