અંકલેશ્વરમાં પીરામણ ગામ નજીક અંડરબ્રિજ પાસે ટ્રક ફસાઈ

ભારે વાહનો પર પ્રતિબંધ છતાં ટ્રક પ્રવેશતા એન્ગલ તૂટી,વાહનવ્યવહાર પ્રભાવિત

અંકલેશ્વરના પીરામણ ગામ નજીક રેલવે અંડરબ્રિજ પાસે આજે એક હાઈવા ટ્રક ફસાઈ ગઈ હતી. આ ઘટનામાં અંડરબ્રિજ પર લગાવવામાં આવેલો એન્ગલ તૂટી પડ્યો હતો, જેના કારણે વાહનવ્યવહાર પ્રભાવિત થયો હતો.અંકલેશ્વરના હવા મહેલથી પીરામણ ગામને જોડતા માર્ગ પર ભારે વાહનોની અવરજવર પર પ્રતિબંધ મૂકવામાં આવ્યો છે. તંત્ર દ્વારા હવા મહેલ ઢાળ પાસે રેલવે અંડરબ્રિજ નજીક આ એન્ગલ લગાવવામાં આવ્યો હતો, જેથી ભારે વાહનો પસાર ન થઈ શકે.આજે સવારે એક હાઈવા ટ્રક પ્રતિબંધિત માર્ગ પરથી પસાર થઈ રહી હતી ત્યારે તેની કેબિનનો ભાગ એન્ગલમાં ફસાઈ ગયો હતો.ટ્રક ફસાતા એન્ગલ તૂટી પડ્યો અને રસ્તા પર નમી ગયો હતો.આ ઘટનાને પગલે સ્થળ પર દોડધામ મચી ગઈ હતી. એન્ગલ તૂટી પડતા વાહનવ્યવહાર ખોરવાઈ ગયો હતો અને વાહનોની અવરજવર પર અસર થઈ હતી.